Qazaq-qyrǵyz taýar aınalymyn 1 mlrd dollarǵa jetkizý qajet
«Bizdiń taýar aınalymymyz aǵymdaǵy jyldyń 10 aıynda 13 paıyzǵa óskenine qaramastan qolda bar múmkindikti belsendi paıdalaný qajet. Ol úshin bizdiń taýarlardyń ataýlaryn keńeıtý múmkinshiligin qarastyrǵan jón. Bizdiń alǵa qoıyp otyrǵan basty maqsatymyz - 2020 jylǵa qaraı ózara taýar aınalymy kólemin 1 mlrd dollarǵa jetkizý»,- dedi Qazaqstan Prezıdenti.
Elbasy Qazaqstan qyrǵyz ekonomıkasynyń negizgi ınvestorlarynyń biri bolyp otyrǵandyǵyn atap ótip, eki eldiń ınvestorlary úshin munan ary qolaıly jaǵdaı jasaý mańyzdylyǵyna toqtaldy.
«Investıtsııalyq yntymaqtastyqty jaqsartý, saýda-ekonomıklayq qarym-qatynastardy jandandyrý maqsatynda Qazaqstan men Qyrǵyzstannyń iskerlik keńesin qurý múmkinshiligin talqyladyq. Mundaı alań bizdiń elderimizdiń sharýashylyq júrgizýshi sýbektileri arasyndaǵy tikeleı baılanystardy nyǵaıtýǵa múmkindik beredi, iskerlik seriktestikti kúsheıtedi. Kásiporyndar arasyndaǵy daýly sátterdi retteýge septigin tıgizedi», - dedi Nursultan Nazarbaev.
Memleket basshysy qyrǵyz áriptesimen bolǵan kelissózder barysynda sý-energetıkalyq yntymaqtastyq, Araldy qutqarý halyqaralyq qorynyń jumysyn jandandyrý máseleleri de qozǵalǵanyn aıtty.
«Ortalyq Azııanyń transshekaralyq ózenderiniń sý qory, bizdiń elderimizdiń arasyndaǵy dostyq pen senimdi nyǵaıtatyn, barlyq qatysýshy elderdiń múddesi úshin kádege jaraıtyn ortaq baılyq bolýy tıistigin taǵy da bir mártte qýattadyq»,- dedi Qazaqstan Prezıdenti.
Nursultan Nazarbaevtyń aıtýynsha, shaǵyn jáne keńeıtilgen quramdaǵy kelissózder barysynda óńirlik, jahandyq kúntártiptegi ózekti máseleler boıynsha pikir almasylyp, mádenı-gýmanıtarlyq saladaǵy yntymaqtastyqty odan ary jandarý qajettiligi atalyp ótilgen.
«Talqylaý qajet bolǵan barlyq máseleler talqylandy. Bizdiń qarym-qatynasymyzǵa keleshekte kedergi keltirýi múmkin aıtylmaı qalǵan, qandaı da bir jasyryn máseleler qalmady. Jáne osynaý senimge negizdelgen ashyq ahýalda biz qurylatyn komıssııalar men toptar osy ýaǵdalastyqtardyń árbir tarmaǵynyń oryndalýyn baqylaýǵa alady dep mámilege keldik», - dedi Elbasy.