Qazaq-qyrǵyz shekarasyndaǵy júk kólikteri keptelisine qatysty málimet usynyldy

ASTANA. QazAqparat – QR Qarjy mınıstrligi Memlekettik kirister komıteti osy ýaqytta Qazaqstan-Qyrǵyz shekarasynda júk kólikteriniń keptelisi joq ekendigin málim etti, dep habarlaıdy QazAqparat.

«Qazirgi ýaqytta Qazaqstannyń «Qarasý» ótkizý beketinde júk mashınalarynyń keptelisi joq. Post jumysy shtattyq rejımde júrip jatyr», - delingen habarlamada.

Málim etilgendeı, qazaq-qyrǵyz shekarasynda júk kólikteriniń ýaqytsha keptelisi Reseıden tranzıtpen Qyrǵyzstanǵa bara jatqan kólikterdiń bir mezgilde kelýinen bolǵan.

«22 qyrkúıekten bastap Qazaqstan-Reseı shekarasynda Reseı azamattarynyń legi artty, olardy birinshi kezekte ótkizdi.

Júk kólikteriniń Reseıden Qazaqstan aýmaǵyna kirýin Reseı shekara qyzmeti ýaqytsha shektegen bolatyn.

Al Reseı azamattarynyń legi azaıǵannan keıin Reseı tarapyna júk kólikterdi Qazaqstan men Qyrǵyzstan baǵytyna bir mezette ótkizdi.

Osy sebepti «Qarasý» beketine júk mashınalarynyń bir mezgilde kelýi baıqaldy. Qazirgi ýaqytta Qazaqstannyń shekara qyzmeti men Memlekettik kirister komıtetiniń eksporttyq baqylaýy shtattyq rejımde jumys istep tur», - delingen usynylǵan habarlamada.