Qazaq-qyrǵyz shekarasynda zańsyz janarmaı tasymaldaý júıesi anyqtaldy

NUR-SULTAN. QazAqparat – Qazaqstan shekarashylary janar-jaǵarmaıdy shekara arqyly tasymaldaýǵa arnalǵan jerasty magıstralin anyqtady. Bul týraly QR UQK ShQ baspasóz qyzmetinen málim etti, dep habarlaıdy QazAqparat.

«Memlekettik shekaranyń kúzetin qamtamasyz etý mindetterin atqarý barysynda qazaqstandyq shekarashylar qyrǵyzstandyq áriptesterimen birlesip, qazaq-qyrǵyz shekarasy baǵytyndaǵy Jambyl oblysynyń shekara mańyndaǵy aýmaǵynan jer astyna qazyp tóselgen eki plastıkalyq shlangini anyqtady. Shlanginiń birinen benzın ısi bar suıyqtyq tabyldy. Aldyn ala boljam boıynsha, anyqtalǵan jaıt shekara arqyly zańsyz otyn tasymaldaýǵa arnalǵan, jaqsylap jasyrylǵan jer asty magıstrali bolýy yqtımal», - delingen habarlamada.

Atalǵan fakti boıynsha tıisti organdarǵa aqparat berildi. Qazirgi ýaqytta tekserý is-sharalary júrgizilip jatyr.