Qazaq-qyrǵyz shekarasynda 1 mln astam jalǵan aktsız markasyn elge ákele jatqan adam ustaldy

NUR-SULTAN. QazAqparat - Qyrǵyz Respýblıkasynan kele jatqan júk kóliginen Belarýs Respýblıkasynyń 1,1 mln jalǵan aktsız markalary tabyldy. Bul týraly Memlekettik kirister komıtetine silteme jasap QazAqparat habarlaıdy.

Qyrǵyz Respýblıkasynyń syrtqy ekonomıkalyq qyzmetiniń josyqsyz qatysýshylary eki eldiń arasyndaǵy ýaǵdalastyqty paıdalana otyryp, Qazaqstanǵa deklaratsııalanbaǵan, kontrafaktilik júk ákelý úshin ózderiniń jasyryn shemasyn qoldanady.

Mysaly, 28 sáýirde Qyrǵyz Respýblıkasynan kele jatqan júk kóligin tekserý kezinde Belarýs Respýblıkasynyń 1,1 mln jalǵan aktsızdik markalary anyqtaldy.

Bul is materıaldary Jambyl oblysy boıynsha ekonomıkalyq tergeý departamentine jiberildi.

Sondaı-aq, atalǵan kólikten 2 myńnan astam deklaratsııalanbaǵan taýar (beınebaqylaý júıesi, kıim-keshek jáne sporttyq qural-jabdyqtar) tabyldy.

Baqylaýdy álsiretýdiń saldarynan zańbuzýshylyqtar aıtarlyqtaı ósti jáne Qyrǵyz Respýblıkasynan qujattarǵa sáıkes Qazaqstan arqyly Reseı Federatsııasyna tranzıtpen ótýge tıisti maınıng qural-jabdyqtary men elektrondy temeki ákelý faktileri jıileı túsken.

Sáýir aıynda maınıng qural-jabdyqtary boıynsha jalǵan tranzıttiń 6 faktisi anyqtaldy, ıaǵnı tranzıt dep málimdelgen taýarlar Qazaqstan aýmaǵynda qalǵan.

Kásipkerlik sýbektileriniń mundaı áreketteri EAEO-daǵy seriktes elderdiń bıýdjetine zııan keltiredi, sondyqtan baqylaý kúsheıtiletindigin aıta ketý kerek.