Qazaq kúresinen ótetin «Álem Barysyna» tórt qazaqstandyq balýan qatysady
16:30, 28 Tamyz 2017
ASTANA. QazAqparat - 8 qyrkúıek kúni Astanadaǵy «Barys Arena» sport saraıynda «EXPO Astana» halyqaralyq mamandandyrylǵan kórmesi aıasynda qazaq kúresinen «Álem Barysy» absolıýtti álem chempıonatyna tórt qazaqstandyq balýan qatysady, dep habarlaıdy QazAqparat tilshisi.
«Qazaqstan Barysy» qazaq kúresin damytý qorynyń baspasóz qyzmetiniń habarlaýynsha, jarysqa elý eldiń balýany keledi dep josparlanǵan. Sheteldik sportshylardan bólek, bedeldi birinshilikke Qazaqstannyń eń myqty tórt balýany qatysady.
Aıta keteıik, osyǵan oraı 22 tamyzdan bastap qazaq kúresinen Qazaqstan Ulttyq quramasy elordada oqý-jattyǵý jıynyn ótkizýde.
Jıyn qorytyndysy boıynsha «Álem Barysynda» Qazaqstan namysyn qorǵaıtyn balýandar anyqtalady. Bas jattyqtyrýshy Erlan Estektiń jetekshiligimen ótkizilip jatqan jıynda Aıbek Nuǵymarov, Muhıt Tursynov jáne taǵy basqa belgili balýandar bar.