Qazaq kúresinen Qazaqstan quramasynyń formasy tanystyryldy

ASTANA. QazAqparat - Halyqaralyq qazaq kúresi federatsııasynyń prezıdenti, QR Energetıka mınıstri Qanat Bozymbaev qazaq kúresinen álem chempıonatyna qatysatyn Qazaqstan quramasynyń formasyn tanystyrdy, dep habarlaıdy QazAqparat tilshisi. 

Tanystyrylǵan forma qazaq kúresinen Ulttyq quramanyń alǵashqy tolyq kıim-keshegi. Toptamada sporttyq kostıým, aıaq kıim, kúrteshe jáne sómke syndy ózge de kerek jabdyqtar bar.

Álem chempıonatynda el namysyn 9 sportshy qorǵamaq.

«Álem chempıonatynda 40 memleketten keletin 167 sportshy baq synaıdy. Olardyń arasynda álem chempıondary, Eýropa men Azııa, Panamerıka jeńimpazdary bar. Saıys 8 salmaq sanatynda jáne absolıýttik salmaq kategorııasynda ótedi", - dep atap ótti Q.Bozymbaev Ortalyq kommýnıkatsııalar qyzmetinde ótken baspasóz máslıhatynda.

Buǵan deıin habarlaǵanymyzdaı , qazaq kúresinen álem birinshiligi 28-29 qazan kúnderi Astanadaǵy "Barys-Arena" muz saraıynda ótedi. Salmaq ólsheý jáne jerebe tartý rásimi "Han Shatyr" saýda jáne oıyn-saýyq ortalyǵynda 27 qazanǵa josparlanǵan.