Qazaq kúresinen álem chempıonatyndaǵy eń aýyr salmaqtaǵy balýandar kim

ASTANA. QazAqparat - Astanada qazaq kúresinen ótip jatqan balýandardyń ishinde eń jeńil jáne eń aýyr salmaqtaǵy balýandardyń esimderi belgili boldy, dep habarlaıdy QazAqparat tilshisi.

Eń jeńil salmaqtaǵy balýan qazaqstandyq Marat Nyǵmatýllaev bolsa, eń aýyr salmaqtaǵy balýan Jańazelendııadan kelgen Pemberton Chıko atandy. Otandasymyzdyń salmaǵy 54 keli  800 gramm bolsa, Chıkonyń taza salmaǵy 178 keli 600 gramm.

Osy alyp salmaqtaǵy balýanmen boz kilemde otandasymyz Rýslan Ábdirazaqovtyń joly túıisýi múmkin.

Aıta keteıik, álem birinshiligine 40 memleketten kelgen 166 sportshy  baq synap jatyr. Olar 9 salmaq dárejesinde 40 medal men 40 myń AQSh dollaryn quraıtyn júlde qoryn sarapqa salady. Ár salmaq dárejesiniń jeńimpazdary 2000 AQSh dollaryna ıe bolsa, ekinshi orynǵa - 1000 AQSh dollary, úshinshi orynǵa - 500 AQSh dollary beriledi. Al absolıýtti salmaq jeńimpazy - 5000, ekinshi oryn - 2000, úshinshi oryn - 1000 AQSh dollaryna ıe bolady.

Qazaqstan quramasynan toǵyz sportshy qatysady. Olar: Marat Nyǵmatýllaev 55 keli, Qýanysh Ysqaqov 60 keli, Qasymhan Tólenbaı 66 keli, Ǵalymjan Ábdirahmanov 74 keli, Ersultan Muzafarov 82 keli, Ádiljan Ystybaev 90 keli, Aleksandr Kasachev 100 keli, Rýslan Ábdyrazaqov 100+ keli, Aıbat Seıten (túıe balýan).