Qazaq kúresin mektep baǵdarlamasyna engizý jumystary bastaldy

NUR-SULTAN. QazAqparat - Elordada Halyqaralyq Qazaq kuresi federatsııasy, Dúnıejúzilik qazaq kúresi federatsııasy jáne Respýblıkalyq qazaq kúresi federatsııasynyń birlesken kongresinde sala mamandarynyń qoldaýymen Qazaq kuresi qaýymdastyǵy quryldy, dep habarlaıdy QazAqparat tilshisi.

Qaýymdastyqtyń prezıdenti qyzmetine Kárim Másimov saılandy.

«Búgin biz qazaq kúresi tarıhynyń jańa paraǵyn ashý úshin jınalyp otyrmyz. Osy kezge deıin Qazaqstanda Qazaqsha kúres federatsııasy qurylǵan bolatyn. Elimizde respýblıkalyq jarystar, halyqaralyq kezdesýler ótkizilýde. Biz qazaq kúresin Olımpıada qataryna kirgizýdi maqsat etip otyrmyz, sol sebepti Qazaqstan barysy, Qazaqsha kúres uıymdaryn biriktiretin Qazaq kuresi assotsıatsııa quryldy», - deıdi Kárim Másimov.

Ol búgingi tańda qazaq kúresiniń deńgeıi óte joǵary dep baǵalaýǵa bolatynyn aıtty.

«Eli ishindegi chempıonattar men týrnırlerdiń deńgeıi jalpy halyqtyń qyzyǵýshylyǵyn arttyryp keledi. Sondaı-aq, ulttyq kúrestiń beınesi álemdik deńgeıde qalyptasyp úlgerdi. Azııa, Eýropa, álem chempıonattary turaqty túrde ótkizilýde. Osy rette respýblıkalyq federatsııa tarapynan qazaq kúresin mektep baǵdarlamasyna engizý jumystary bastaldy. Aldaǵy oqý jyly Nur-Sultan qalasyndaǵy 5 mektepte varıatıvti negizde engiziledi. Qazaq kúresiniń elimizdegi bilim salasyna enýin Qazaq kúresi akademııasy júzege asyratyn bolatyn. Bul ulttyq kúrestiń baǵyndyrǵan bir belesi», - dedi Kárim Másimov.