Qazaq qoǵamynda aqsaqaldar ınstıtýtynyń róli erekshe – Erlan Qarın
Hatty QR Memlekettik hatshysy hatshylyq meńgerýshisiniń orynbasary Erjan Baıtiles oqyp berdi.
«Qurmetti el aǵalary! Halqymyz baǵzydan qarııasyn syılap, aqylyn tyńdap sózine toqtaǵan. El basyna túsken qıyn-qystaý kezeńde de aqsaqaldar tóreligin aıtyp, týra jol nusqaǵan. Beıbit zamanda eldiń birligine eńbek etip, óskeleń urpaqtyń tárıbesine atsalysqan. Bul úrdis turmys-saltymyzben birge úzdiksiz jalǵasyp keledi. ıAǵnı qazaq qoǵamynda aqsaqaldar ınstıtýtynyń róli qashanda erekshe. Aýzy dýaly, sózi ýáli qarııalardyń eldi yntymaqqa shaqyryp, memlekettiń tutastyǵy men tynyshtyǵyna qyzmet etýi asa mańyzdy mindet. Sondyqtan QMDB bastamashy bolǵan búgingi forýmnyń máni men mańyzy óte joǵary dep esepteımin», - dedi E. Qarın óz quttyqtaýynda.
Ásirese qazirgideı álem ábigerge túsip, memleketter arasynda túrli qaqtyǵystar oryn alyp, saıası-ekonomıkalyq daǵdarystarmen betpe-bet kelip turǵan shaqta eldiń birligi aýadaı qajet.
«Jyl basynda bolǵan Qańtar qasireti de kóp dúnıege qaıta qarap, jańasha tujyrym jasaý keregin kórsetti. Osy oraıda búgingi qoǵamǵa eń bastysy – eldiń tutastyǵy jáne halyqtyń amandyǵy kerek. Otandastarymyzdyń ál-aýqatyn kóterip, eldiń saıası jáne ekonomıkalyq ahýalyn jaqsartý baǵytynda Memleket basshysynyń bastamasymen kóptegen sharalar, aýqymdy jumystar atqarylyp jatyr. El ıgiligin arttyratyn bastamalardy birlikpen ǵana iske asyra alamyz.
Búgingi jıynǵa qatysyp otyrǵan ardaqty aqsaqaldarymyzdyń barlyǵy Táýelsiz Qazaqstannyń qalyptasýyna zor úles qosty. Sizderdiń ómirlik tájirıbelerińiz ben kórgen-bilgenderińiz jastardyń ultjandy, memleketshil bolyp ósýine yqpal etedi. Osy oraıda QMDB janynan eldiń aldynda, kóshtiń basynda júrgen ózderińizdeı aqsaqaldardan keńes qurylǵany quptarlyq bastama. Endi osy úrdis eldiń ortalyǵymen ǵana shektelip qalmaı, oblys, aýdan, aýyldarda da jalǵasyn tabýy kerek. Bul eldiń birligin arttyryp, yntymaǵyn eseleı túsedi dep senemin» delingen Memlekettik hatshynyń hatynda.
Aıta keteıik, elordada «Qarııalar – el qazynasy» atty І respýblıkalyq aqsaqaldar forýmy bastaldy. Jyl basynda QMDB janynan Aqsaqaldar keńesi qurylǵan.