Qazaq qoǵamyna ne kerek degende áli kúnge Abaıǵa júginip, sodan tabamyz - Dáýletkereı Kápuly

NUR-SULTAN. QazAqparat - Abaıdyń keshegi ózi ómir súrgen zamanynda aıtqan azamattyq oılary búgingi kúni de ózektiligin joıǵan joq. Mundaı pikirdi QR Jazýshylar odaǵy Nur-Sultan qalalyq fılıalynyń dırektory, aqyn Dáýletkereı Kápuly bildirdi, dep habarlaıdy QazAqparat tilshisi.

«Abaı halyqtyń Abaıy bolǵannan keıin bul kún ulttyq merekege aınalyp jatyr. Abaıdyń keshegi ózi ómir súrgen zamanynda halyqtyń muńyn muńdaǵan dúnıesi, jalpy azamattyq oılary búgingi kúni de ózektiligin joıǵan joq. Sonyń ishinde qazaq qoǵamyna ne kerek, qazaq qoǵamyna qandaı qadir-qasıet qajet degende áli kúnge Abaıǵa júginemiz. Ony Abaıdan tabamyz. Sondyqtan Abaı kúni tek bir ǵana kún emes jyl boıy atalyp ótilýi tıis. Qazaqtyń ómir súrý ǵurpynda, saltynda Abaıdyń oılaý júıesi, Abaıdyń qazaqty súıýi, ultqa degen mahabbaty jalǵasyn tabýy kerek. Óıtkeni, Abaıdy tek bir kún ǵana ultyqtap, qalǵan kúnderi umytý tanymymyzǵa jat dúnıe. Abaımen maqtanǵan kúnniń ózinde de onyń shyǵarmalaryn tanyp baryp qana maqtanǵanymyz jón», - dedi Dáýletkereı Kápuly.

Aıta keteıik, qazaqtyń uly aqyny Abaıdyń 175 jyldyq mereıtoıyna oraı QR Memlekettik hatshysy Qyrymbek Kósherbaev bastaǵan bir top memleket jáne qoǵam qaıratkeri elordadaǵy Abaı eskertkishine saltanatty jaǵdaıda gúl shoqtaryn qoıǵan edi.

Esterińizde bolsa taıaýda Qazaqstan Úkimetiniń qaýlysymen 10 tamyz Abaı kúni bolyp belgilendi.