Qazaq-qytaı qatynasy qarqyndy damyp jatyr – Qasym-Jomart Toqaev
Kezdesý barysynda Qazaqstan men Qytaı arasyndaǵy jan-jaqty strategııalyq seriktestiktiń jaı-kúıi jáne ony damytý perspektıvasy talqylandy. Sondaı-aq Qasym-Jomart Toqaev pen QHR Tóraǵasy Sı Tszınpınniń buǵan deıingi kezdesýlerinde qol jetkizilgen ýaǵdalastyqtardy júzege asyrýǵa basa nazar aýdaryldy.
Qazaqstan Prezıdenti Qytaıdyń qarqyndy áleýmettik-ekonomıkalyq damýyn erekshe yqylaspen baqylap otyrǵanyn atap ótti.
«QHR Úkimeti álemdi turaqsyzdyq jaılap turǵan qazirgi kezeńde ekonomıkanyń ornyqtylyǵyn qamtamasyz etýge qatysty mańyzdy máseleni tıimdi sheship otyr. Qytaıdyń jahandyq ekonomıkanyń ornyqty damýyna qosqan eleýli úlesin joǵary baǵalaımyz. Qazaqstan Qytaımen dostyq, tatý kórshilik qarym-qatynasty jáne jan-jaqty strategııalyq yntymaqtastyqty nyǵaıtýǵa qashanda erekshe mán beredi. Qazaqstan QHR-dyń senimdi strategııalyq seriktesi ári tatý kórshisi bolyp keldi jáne keleshekte solaı bolyp qala beredi. Búginde qazaq-qytaı qatynasy qarqyndy damyp jatyr. Buǵan joǵary deńgeıdegi belsendi saıası dıalog, sondaı-aq eki el úkimetteriniń úılesimdi jumysy yqpal etýde, – dedi Qasym-Jomart Toqaev.
Memleket basshysy búgin QHR Tóraǵasy Sı Tszınpınmen óte tabysty kelissóz júrgizgenin atap ótti. Kópjaqty qazaq-qytaı qatynasyn odan ári nyǵaıtý úshin naqty ýaǵdalastyqtarǵa qol jetkizildi.
«Saparymnyń aıasynda búgin Úkimet deńgeıindegi 9 qujatqa, eki eldiń bıznes jáne basqa da qurylymdarymen 20-dan astam kelisimge qol qoıyldy. Qytaıdaǵy Qazaqstan týrızmi jyly aıasynda vızasyz rejımge jáne Transkaspıı halyqaralyq kólik baǵdaryn damytýǵa, sondaı-aq energetıka salasyndaǵy ózara yqpaldastyǵymyzǵa qatysty kelisimderdiń mańyzy zor ekenin atap ótkim keledi», – dedi Prezıdent.
Lı Tsıan ekijaqty baılanystardy odan ári nyǵaıtý turǵysynan Qasym-Jomart Toqaevtyń QHR-ǵa jasaǵan saparynyń mańyzdylyǵyna toqtaldy
«Qazaqstan men Qytaı halyqtaryn ǵasyrlar boıǵy dostyq qatynastar biriktiredi. Bıyl mamyr aıynda Qytaı teledıdaryna bergen suhbatyńyzda Siz bizdiń elimizde bilim alǵan jáne jumys istegen kezdegi estelikterińizben bólisip, qytaı tilin jetik biletin adam retinde bizdiń aýdıtorııamyzdy baýrap aldyńyz. Men de suhbatty kórdim. Bul elderimiz arasyndaǵy dostyqty nyǵaıtýǵa tyń serpin berdi dep oılaımyn. Sizdiń Tóraǵa Sımen kezdesýińizdiń qorytyndysy boıynsha mańyzdy ýaǵdalastyqtarǵa qol jetkizildi. Olar memleketterimiz arasyndaǵy qarym-qatynastyń jańa «altyn 30 jyldyǵy» kezeńine baǵyt-baǵdar beredi. Qytaı tarapy áriptesterińizben birge joǵary deńgeıde qol jetkizilgen osy ýaǵdalastyqtardy júzege asyrýǵa, ǵasyrlar boıǵy dostyq baılanystar men ózara tıimdi yntymaqtastyqty nyǵaıtýǵa daıyn», – dedi Lı Tsıan.
Kezdesý barysynda aýyl sharýashylyǵy, ınvestıtsııa, kólik jáne tranzıt, energetıka, munaı-gaz hımııasy, geologııalyq barlaý, avtokólik qurastyrý, joǵary tehnologııa, tsıfrlandyrý salalaryndaǵy ózara yqpaldastyqty nyǵaıtý máseleleri qarastyryldy.
Sonymen qatar Qasym-Jomart Toqaev pen Lı Tsıan transshekaralyq ózenderdi birlesip paıdalaný jónindegi yntymaqtastyqty jalǵastyrýǵa ózara beıildi ekenin rastady.
Eske salaıyq, keshe Qasym-Jomart Toqaev Qytaı Halyq Respýblıkasyna resmı saparmen bardy.
Memleket basshysy QHR Tóraǵasy Sı Tszınpınmen kelissóz júrgizdi. Osy kelissóz nátıjesinde eki eldiń delegatsııa músheleri birqatar qujatqa qol qoıdy.
QR Prezıdenti Beıjińde Ábý Nasyr Ál-Farabıge qoıylǵan bıýstti saltanatty túrde ashty.
Keıin Q.Toqaev Beıjiń lıngvıstıkalyq ınstıtýtynda taǵylymdamadan ótken kezinde ózine dáris bergen professor Lıý Shıtsınmen áńgimelesip, SINOPEC kompanııasy dırektorlar keńesiniń tóraǵasy Ma ıÝnshendi qabyldady.
Odan ári Memleket basshysy YTO Express Co., Ltd kompanııasynyń basqarma tóraǵasy Iý Hýeı Dzıaony, CITIC Group kompanııasynyń basqarma tóraǵasy Chjý Hesındi qabyldady.
Al CRRC Sorporation Limited kompanııasynyń basqarma tóraǵasy ári atqarýshy dırektory Cýn ıÝntsaımen áńgime barysynda QTJ Qytaıdyń SRRC kompanııasymen quny 1,3 mlrd dollar bolatyn kelisimge qol qoıatyny belgili boldy.
Q.Toqaevtyń sapary sheńberinde 30 kelisimge qol qoıyldy.