Qazaq-Qyrǵyz úkimetteriniń ókilderi 65 mln dollardyń kelisimderine qol qoıdy

<p>Jambyl oblysynda ótip jatqan Qazaqstan men Qyrǵyzstannyń Óńiraralyq yntymaqtastyq forýmy Qazaq-Qyrǵyz iskerlik dıalogynan bastaldy. Onda taraptar óńirlerdiń ınvestıtsııalyq jáne eksporttyq múmkindikterin, aýyl sharýashylyǵy salasyndaǵy yntymaqtastyq máselelerin talqylady, dep habarlaıdy <a href="https://kaz.inform.kz/" target="_blank" rel="noopener">QazAqparat</a>.</p>

QR saýda jáne ıntegratsııa vıtse-mınıstri Qaırat Tórebaev qatysýshylarǵa joldaǵan quttyqtaý sózinde Qazaqstan men Qyrǵyzstan – jaqyn baýyrlas elder, Ortalyq Azııa óńiriniń damýyna áseri zor saýda-ekonomıkalyq baǵytyndaǵy negizigi áriptester ekendigin atap ótti.

"Búginde ekijaqty saýdanyń damýyndaǵy serpindi dınamıka baıqalady. Aǵymdaǵy jyldyń jeti aıynda eki el arasyndaǵy saýda 12,7 paıyzǵa ósip, 755,4 mıllıon dollardy qurady. Qazaqstannan Qyrǵyzstanǵa eksport 2023 jylǵy qańtar-shildede 17,5 paıyzǵa ósip, 469,7 mıllıon dollarǵa jetti. Import óz kezeginde 5,6 paıyzǵa artyp, 285,6 mıllıon dollardy qurady. Qazir eki eldiń aldynda ózara saýda deńgeıin 2 mıllıard dollarǵa jetkizý mindeti tur", - dedi vıtse-mınıstr.

Ol kórsetkishke qol jetkizý úshin eki eldiń úkimetteri bıznes ókilderimen tyǵyz yntymaqtastyq ornatýǵa, qajetti qoldaýlardy kórsetýge, kelissózder júrgizýge daıyn.

Qaırat Tórebaev Qyrǵyz kásipkerlerin Qazaqstanda óndiris ashýǵa shaqyrdy, ol úshin el óńirlerinde barlyq jaǵdaı jasalýda.

"Qazaqstan aýmaǵynda eksportqa baǵyttalǵan birlesken óndiristerdi júzege asyrý úshin arnaıy ekonomıkalyq aımaqtarmen qatar barlyq qajetti bazalar men preferentsııalar júıesi jasalǵan. Ár óńirdiń ózindik mamandanýy bar jáne óz preferentsııalaryn usynýǵa daıyn", - dep atap ótti vıtse-mınıstr.

Budan ári Qyrǵyz Respýblıkasy ekonomıka jáne kommertsııa mınıstriniń orynbasary Qanatbek Ábdirahmanov sóz alyp, óz oıyn ortaǵa saldy.

Ekinshi sessııany Qazaqstan Respýblıkasynyń aýyl sharýashylyǵy vıtse-mınıstri Erbol Tasjúrekov pen Qyrǵyz Respýblıkasy aýyl sharýashylyǵy mınıstrliginiń naqty sektor basqarmasynyń basshysy Bektur Myrzabekov ashty.

"Qazaqstan-Qyrǵyzstan qarym-qatynastary senim men ózara túsinistiktiń joǵary deńgeıimen erekshelenedi. Ekijaqty qarym-qatynastar turaqty, progressıvti jáne syndarly, ózara tıimdi yntymaqtastyqty damytýǵa baǵyttalǵan. Ótken jyly aýyl sharýashylyǵy salasyndaǵy yntymaqtastyq týraly vedomstvoaralyq memorandýmǵa qol qoıylǵan desek, bul memleketterdiń kópqyrly baılanystaryna qosymsha serpin berýde. Negizgi basymdyqtardyń qatarynda aýyl sharýashylyǵy ónimderiniń ózara saýdasynyń kólemin arttyrýǵa basa kóńil bólinýde. Aǵymdaǵy jyldyń 7 aıynyń qorytyndysy boıynsha, bul kórsetkish 23 paıyzǵa ósti", - dedi Erbol Tasjúrekov.

Ózara iskerlik dıalogtar qorytyndysy boıynsha Qazaqstan Respýblıkasy men Qyrǵyz Respýblıkasynyń kásiporyndary arasynda 65 mıllıon AQSh dollary kólemindegi 10 kelisimshartqa qol qoıyldy.

Bul kúni Taraz qalasyndaǵy Dostyq úıinde eki eldiń isker top ókilderi B2B formatynda kelissózder júrgizdi.

Sondaı-aq, qonaqtar qolónershiler men jergilikti taýar óndirýshilerdiń kórmelerin tamashalady.

Aıta keteıik, forým aıasyndaǵy sharalar eki kúnge josparlanǵan.