Qazaq kınosy kúni: Reseıdegi qazaqstandyq kınolar tsıfrlyq formatta óńdeledi

NUR-SULTAN. QazAqparat – Búgin elimizde qazaq kınosy kúni atalyp ótilýde. Aıtýly merekege oraı QR Mádenıet jáne sport mınıstri Aqtoty Raıymqulova qazaqstandyqtarmen otandyq kıno salasyndaǵy jaǵymdy jańalyqpen bólisti, dep habarlaıdy QazAqparat.

Mınıstr aldymen qazaqstandyqtardy aıtýly merekemen quttyqtady.

«Sizderdi 12 qyrkúıek – Qazaq kınosy kúnimen shyn júrekten quttyqtaımyn! Kıno – mádenıet pen ónerdiń kósh basynda turǵan, aýdıtorııasy tórtkúl dúnıeni tórine otyrǵyzǵan aýqymdy sala. Ǵumyry ǵasyrmen ólshenetin qazaq kınematografııasy alǵashqy qarlyǵashy «Amangeldiden» bastap osy kúnge sheıin kórermenge túrli týyndylar tartý etip keledi. Ár kınonyń ýaqyt keńistigindegi alar ornyn aıqyndaıtyn, bylaısha aıtqanda taǵdyryn sheshetin qudiret – ol qalyń kórermen ekeni sózsiz. Bizdiń elimizde búgingi kıno talabyna jaýap bere alatyn, kópshiliktiń talǵam údesinen shyqqan fılmder qatary jyl ótken saıyn artyp kele jatqany qýantady», - dep jazdy A. Raıymqulova Facebook paraqshasynda.

Onyń aıtýynsha, búginde otandyq kınoda jas mamandar shoǵyry qalyptasty.

«Shynaıy oqıǵa jelisimen túsirilgen, babalar danalyǵyn dáriptegen, atalar amanatyn arqalaǵan tarıhı týyndylarmen qatar kózi qaraqty ər adamdy nemquraıdy, jaıbaqarat qaldyrmaıtyn, əleýmettik máselelerdiń ózektiligin júrekke jetkizip, tolǵandyratyn otandyq týyndylar bedeldi halyqaralyq festıvalderde júldege ıe bolyp, álemdik kınogerlerdiń joǵary baǵasyn alyp jatyr. Aldyńǵy aǵa býynnyń izin basyp, ózindik órnegin qalyptastyryp kele jatqan jas mamandar shoǵyry qalyptasty»,- deıdi ol.

Odan bólek, mınıstr kınematografııa salasyna kórsetiletin memleket qoldaýdyń jalǵasatynyn aıtty.

«Elimizdegi kıno naryqta taqyryby jaǵynan ər alýan qazaqstandyq fılmdermen qosa álemdik tanymal kınostýdııalardyń tańdaýly ónimderi kóp. Atalǵan kartınalardyń bári endi ana tilimizde aýdarmamen kórsetilýi mindetti ekeni arnaıy zańda kórsetilgen. Osy rette birqatar anımatsııalyq týyndynyń qazaq tilindegi dýblıajyn túsirgen kompanııanyń ózi álemdik naryqta joǵary baǵalaǵanyn aıtpaı ketýge bolmas. Budan bólek, qazir mınıstrlik keńes úkimeti kezinde kórermenge jol tartqan otandyq kınolardy Reseıdiń memlekettik kıno qorynyń arhıvinen sandyq formatta óńdep alý boıynsha jumys júrgizip jatyr», - dedi A. Raıymqulova.