Qazaq handyǵynyń 550 jyldyǵyna oraı áskerılerdiń 20 komandasy jekpe-jekten saıysady

ASTANA. QazAqparat - 14-16 qyrkúıek aralyǵynda Elordada eldigimizdiń mereıli merekesi - Qazaq handyǵynyń 550 jyldyǵyna oraı Qazaqstan Respýblıkasy Ulttyq ulany Bas qolbasshysynyń Kýbogy úshin kúsh-qýat qurylymdary komandalary arasynda jekpe-jekten halyqaralyq týrnır ótedi, dep habarlady Ulttyq ulan baspasóz qyzmetinen.

Atalǵan dúbirli dodany uıymdastyrýǵa elimizdiń Mádenıet jáne sport mınıstrligi Sport jáne dene shynyqtyrý komıtetiniń kúntizbelik josparyna saı Qazaqstan Respýblıkasy Ulttyq ulany men qoıan-qoltyq urystan búkilqazaqstandyq Assotsıatsııasy uıytqy bolyp otyr.

Halyqaralyq týrnırge elimizdiń Qarýly Kúshteriniń, ózge de áskerı qurylymdary men kúsh-qýat organdarynyń jáne osy sport túrinen oblystyq federatsııalardan 20-dan asa qurama komanda, sondaı-aq Reseı Federatsııasy men Qyzǵyz Respýblıkasynan 2 sport komandasy qatysady. Myqtylar saıysqa túsken dodada el namysyn jekpe-jekten álem chempıony Aıbek Hyryhbaı (2012 j.), kıkboksıngten Azııa chempıony Medet Sametaev (2015 j.), kıkboksıngten ótken «Qyzyljar» týrnıriniń chempıony Álken Tólegenov (2010 j.) jáne basqa da saıypqyran sportshylar qorǵaıtyn bolady. Jarystyń saltanatty ashylýy 15 qyrkúıek kúni «Dáýlet» sport kesheninde ótedi. Dodanyń ashylý rásimine kúsh-qýat organdary basshylary, Parlament depýtattary, sport komıtetteriniń jetekshileri, sondaı-aq jekpe-jek túrlerinen respýblıkalyq sport uıymdarynyń jáne buqaralyq aqparat quraldarynyń ókilderi shaqyrylǵan. 16 qyrkúıek kúni ár túrli salmaq dárejesi boıynsha jeńimpaz atanǵandardy marapattaý rásimi ótedi.