Qazaq handyǵynyń 550 jyldyǵyn atap ótý jastardy otansúıgishtikke tárbıeleýge súbeli úles qosady - Ó. Ozǵanbaev
Bul týraly búgin Astanadaǵy Táýelsizdik saraıynda Qazaq handyǵynyń 550 jyldyq mereıtoıyna arnalǵan saltanatty jıyn barysynda tilshilerge bergen suhbatynda Respýblıkalyq «Ardagerler uıymy» qoǵamdyq birlestigi Ortalyq keńesiniń tóraǵasy Ómirzaq Ozǵanbaev málim etti.
«Búgin barsha halqymyz bas qosyp, Qazaq handyǵynyń 550 jyldyǵyna oraı úlken merekeniń kýási bolyp otyr. Ǵasyrlardyń ishinde qazaq halqy alýantúrli joldardan ótti, ıaǵnı qıyn kezder de boldy, baqytty sátterdi de bastan ótkerdi. Minekı, búginde Táýelsiz el bolyp, óz basymyzǵa shańyraq kóterip, úlken eldik sharýalardy tyndyryp jatqan kezeńdemiz. Bul jyldardyń ishinde qazaq halqy birigý, irilendirý, eldikigimizdi nyǵaıtý maqsatymen ómir súrdi. Qazirgi jaǵdaıda qazaq eli álem tanyǵan memleketke aınalyp otyr, óńirimizde kósh bastap kele jatqan memleketpiz. Aldymyzda kóptegen murattar bar, osy oraıda úlken maqsat-mindetter tyndyrylyp jatyr. Bizdiń maqsatymyz - «Máńgilik el» bolý»,- dep toqtaldy Ómirzaq Ozǵanbaev.
Osy oraıda ol Qazaq handyǵynyń 550 jyldyǵyn atap ótý jastar arasynda otansúıgishtik sezimdi tárbıeleýge súbeli úles qosatyndyǵyn atap ótti.
«Búgingi ótkizilip jatqan sharalardyń barlyǵy Qazaqstannyń irgeli memleket ekenin, tamyrymyz tereńde jatqandyǵyn kórsetip otyr. Osy merekege daıyndyq aıasynda kóptegen materıaldarǵa taldaý jasalyp, shetelden qundy derekter jetkizildi. Tarıhı-mádenı eskertkishterimiz jańǵyrtylyp, qalpyna keltirildi. Osy baǵyttaǵy jumystardyń barlyǵy tarıhymyzǵa qaıtadan tereńirek úńilýge múmkindik berdi»,- dedi Ó. Ozǵanbaev.