Qazaq handyǵyna 550 jyl: BQO-da Bókenbaı batyrǵa arnalǵan sharalar ótkizildi (FOTO)

ORAL. QazAqparat - Shyńǵyrlaý aýdanynda dańqty qolbasshy, saıasatker Bókenbaı Qarabatyrulynyń esimi qurmetpen atalady. Qazaq handyǵynyń 550 jyldyǵyna oraı aýdandyq mádenıet úıinde «Qazaq handyǵy jáne bahadúr Bókenbaı batyr» atty ǵylymı konferentsııa uıymdastyryldy.

Onda aýdan ákimi Aldııar Halelov óńirde Bókenbaı batyrdyń esimin máńgi este qaldyrý baǵytynda birqatar sharalar qolǵa alynǵandyǵyn jetkizdi.

Konferentsııada Q.Jubanov atyndaǵy Aqtóbe óńirlik memlekettik ýnıversıtetiniń professorlary, fılologııa ǵylymdarynyń doktory Alpysbaı Musaev, Bókenbaı batyrdyń urpaǵy Aısulý Tasımova, Tasmola orta mektebiniń dırektory Erlan Aıshýaqov, aýdandyq balalarmen mektep tys jumys ortalyǵynyń dırektory Qýanysh Esenov baıandama jasap, azattyq úshin alysyp ótken er týraly derekter keltirdi.

Jıynda Bókenbaı Qarabatyrulynyń ómiri týraly bıyl túsirilgen «Aqqumnan shyqqan aqberen» atty derekti fılm (avtory - belgili telejýrnalıst, aqyn Munaıdar Balmolda) tuńǵysh ret kórsetildi.

Sonymen qatar aýdan ortalyǵy Shyńǵyrlaý aýylynda Bókenbaı batyrǵa kóshe aty berilip, ol da saltanatpen ashyldy.

Eske sala keteıik, Bókenbaı Qarabatyruly (HVІІІ ǵasyrdyń ekinshi jartysy - sáýir, 1742, Aqtóbe oblysy, Bókenbaı shoqysy) - jońǵar basqynshylaryna qarsy kúreste birikken qazaq áskeriniń bas sardary bolǵan ataqty batyr, mámileger, elshi. Kishi júzdiń Tabyn rýynan shyqqan Bókenbaı batyr Ábilqaıyr hanmen tize qosyp, otyz jyl boıy syrtqy jaýmen kúresti. 1742 jylǵy sáýirde túrkimendermen bolǵan shaıqasta erlikpen qaza tapty.