Qazaq Handyǵy týraly serıaldyń stsenarııi daıyn boldy - A. Muhamedıuly
«Ózderińiz bilesizder, Elbasymyz osy sharaǵa baılanysty Qazaq handyǵy týraly serıal túsirý kerek dep aıtty. Biz árıne ol serıaldyń stsenarııin jasadyq. Óte kúrdeli dúnıe. Sondaı-aq, bizde serıal ǵana bolmaıdy, derekti jáne anımatsııalyq fılmder de kerek. Búldirshinder de óz eliniń tarıhyn bilýi tıis. Osy sharalardyń barlyǵyn shashyratpaı, joǵary deńgeıde ótkizý - ol bizdiń mindetimiz», - dedi mınıstr.
Onyń aıtýynsha, usynys tastalǵan rejısserlik toptar bar, degenmen olardyń qaısysy jumysqa tartylatyny anyqtalǵan joq.
«Rejısser Qazaqstan azamaty bolatyny - naq. Rústem Ábdirashev óziniń jumys tobymen jumys jasaýda. Taǵyda biz Aqan Sataevqa da usynys berdik. Kimniń stsenarııilik toby qyzyqtyraq, sonyky mindetti túrde bolady. Ony kórkemdik keńes sheshedi. Qazir biz stsenarııdiń negizin jasadyq. Sony bizdiń ǵalymdarǵa talqylaýǵa berdik. Nege deseńizder, bul - óte kúrdeli dúnıe. Qatelik jasamaýymyz shart», - deıdi A. Muhamedıuly.
Bas rejısser Qazaqstannan bolady. Degenmen basqa da kómekshi rejısserlerdi shetelden shaqyrý josparlanyp otyr. «Nege deseńizder, Qazaqstanda tarıhı taqyrypqa serıal áli túsirilip kórgen emes. Kórkem fılmder bar árıne, Ermek Tursynov, Satybaldy Narymbet, Rústem Ábdirashov syndy rejısserler jasady ony. Biraq tarıhı turǵydan bizdiń Qazqstanda áli serıal túsirilmegen. Sol úshin biz bul janrǵa óte muqııat bolýymyz kerek», - dedi mınıstr.
«Qazaq memlekettiliginiń 550 jyldyǵy tek qana toılap atap ótý úshin jasalyp jatqan rıtýaldyq mereke emes, eń birinshi - Qazaqstan Egemendiginiń taǵy da bir kórinisi, onyń tuǵyryn nyǵaıtatyn naqty shara. Sonymen birge, tarıhqa qatysty kóptegen pikirler bar, 550 jyldyǵy emes, odan asyp ketken dep jatyr. Biraq, Haıdar Dýlatı men ózge de tarıhshylardyń derekterine súıenip, biz 2015 jyl - Qazaq handyǵynyń 550 jyldyǵy deımiz», - dep túıdi sózin A. Muhamedıuly.