Qazaq halqynyń júregine júzden astam ult ókili syıyp ketedi - uıǵyr etno-mádenı ortalyǵy

ALMATY. QazAqparat - Óńirlik kommýnıkatsııalar qyzmetinde ótken brıfıngide uıǵyr etnomádenı ortalyǵynyń ókilderi qazaqstandyqtardy Alǵys aıtý kúnimen quttyqtady, dep habarlaıdy QazAqparat tilshisi.

Qazaqstan uıǵyrlarynyń respýblıkalyq etnomádenı ortalyǵy joǵary keńesiniń tóraǵasy, «Uıǵyr avazı» qoǵamdyq-saıası gazetiniń bas redaktory Ershat Ásmetovtyń pikirinshe, Alǵys aıtý kúni eń mańyzdy jáne qurmetti kún.

«Óıtkeni alǵys júrekten shyǵady. Alǵys adamdardy jaqyndastyrady, tatýlastyrady. Bul merekeniń jyl saıyn úlken mánge ıe bolyp kele jatqanyna qýanyshtymyn», – deıdi ol.

Sondaı-aq ol qazaq halqynyń júregine júzden astam ult ókili syıyp ketetinin zor qýanyshpen atap ótti.

«Shetelderge jumys babymen barǵanymyzda bári tań qalyp: «Osyndaı kópultty memlekette adamdar qalaı tatý-tátti ómir súredi?» dep suraıdy. Oǵan sebep – qazaq halqynyń, onyń aınalasyndaǵy barlyq ulttar men ulystardyń júreginiń tazalyǵy dep bilemin», – deıdi spıker.

«Jastar assambleıasy» RQU múshesi, Qazaqstan Uıǵyr jastary odaǵynyń tóraǵasy Rýstam Qaıryev ta barsha qazaqstandyqty alǵys aıtýǵa shaqyrdy.

«Bul óte mańyzdy, aıtýly mereke. Naǵyz tektiliktiń meıramy. Alǵys aıta bilý – shyn máninde adamnyń qanshalyqty asyl, jyly júrekti adam ekenin ańǵartady. Barlyǵy úshin «rahmet» aıta bilý kerek. Sondyqtan men, ásirese, jastardy uıalmaı, kóshege shyǵyp, kúlimsirep, árbir qazaqstandyqqa alǵys aıtýǵa shaqyramyn. Búgingi beıbit aspan astynda ómir súrip jatqanymyzǵa árbir qazaqstandyqtyń qatysy bar. Árbir qazaqstandyq osy tatý otbasynyń múshesi. Qazaqstan halqy Assambleıasynyń jáne barsha qazaqstandyqtardyń atynan jastarymyzdy quttyqtap, olarǵa tabys, órkendeý, elimizdiń ekonomıkasynyń damýy jolynda básekege qabiletti bolýyn tileımin», - dep túıindedi ol sózin.