Qazaq halqynyń jaqsylyǵyn esten shyǵarǵan emespin - Larısa Aqsaqalova

ATYRAÝ. QazAqparat –Qazaq halqynyń jaqsylyǵyn, qonaqjaılyǵyn esten shyǵarǵan emespin. Jylyoı aýdanynyń Jańaqaraton kentinde turatyn Larısa Aqsaqalova osylaı deıdi, dep habarlaıdy QazAqparat tilshisi.

Ózge ulttyń ókili bolsa da, qazaq halqynyń salt-dástúrin, ulttyq qundylyǵyn dáriptep júrgen Larısa Aqsaqalovanyń kindik qany osy óńirdegi Mahambet aýdanynda tamǵan. Orta mektepti bitirgen soń sol kezdegi Gýrev pedagogıkalyq ýchılışesine oqý túsken. Ýchılışeni 1986 jyly bitirip, joldamamen Jylyoı aýdanyndaǵy №8 mektepke jumysqa ornalasty.

«Meniń ata-anam Mahambet aýdanynda turdy. Bala kúnimizden qazaq balalarymen birge óstik. Arnaýly bilim alyp, jumysqa ornalasqan soń ár adam ómirlik serigin izdeıdi ǵoı. Men de qıyndyqty birge bóliser, jabyqqanda jubatar, meıirimdi jan kezdesse, sonymen birge baqytty ómir súrsem dep armandaýshy edim. Sondaı azamatty Jylyoı aýdanynan kezdestirdim. Meniń ultym – orys, kúıeýim –qazaq. Óıtkeni, shynaıy mahabbatqa ult ta, din de, til de kedergi emes eken. Buǵan budan 33 jyl buryn Serik ekeýmiz qurǵan otbasymyzdaǵy tatýlyq dálel bola alady. Qazir bizdiń 3 balamyz bar. Olardan 6 nemere kórip otyrmyz» -deıdi qazaqtyń kelini Larısa Aqsaqalova.

Ol qazir Jańaqaraton kentindegi №23 mekteptiń bastaýysh synybyna dáris beredi. Qazaqsha jetik sóıleıdi, qazaq ánderin aıtady. Qazaqqa kelin bolǵan ózge ult ókilderi arasynda ótken saıysqa da qatysyp, júldeli oryn alǵan.

«Serikke turmysqa shyǵarda qobaljyǵanym ras. Biraq, Seriktiń ata-anasy meni óz qyzyndaı kórdi. Qazaq halqy da meni ózge ult dep ógeısitpeı, baýyryna basty. Men qazaq halqynyń jaqsylyǵyn, qonaqjaılyǵyn eshqashan esten shyǵarǵan emespin.

Qazaqtyń otbasyna kelin, ana atanyp, ata-enemniń tálim-tárbıesin, ónegesin aldym. Qazaq halqyna, joldasyma, ata-anasyna alǵysym sheksiz. Osyndaı keń baıtaq qazaq jerinde týyp, qazaq halqynyń arasynda ósip-óngenime dán rızamyn» -deıdi Larısa Aqsaqalova.