Qazaq halqyna bir kún ǵana emes, máńgilik alǵys aıtyp ótemiz – Farıd Aıýpov

<p>TÚRKІSTAN. KAZINFORM &ndash; &laquo;Qazaqstandyq tatar jáne bashqurttar kongresi&raquo; respýblıkalyq qoǵamdyq birlestigi Túrkistan oblysy boıynsha fılıalynyń tóraǵasy Farıt Aıýpov &laquo;Alǵys aıtý&raquo; kúni merekesi bir kúnmen shektelmeýi kerektigin aıtty.</p>

«Meniń oıymsha, bul – tamasha mereke. Sonaý aýmaly-tókpeli zamanda túrli ult ókilderi Qazaqstanǵa jer aýdaryldy. Sol kezde ózge dep ógeısinbeı, ózekten teppeı, baýyrmaldyq kórsetken qazaq halqynyń keńpeıildiligin babalarymyz jyr etip aıtatyn. Sondyqtan qazaq halqyna bir kún ǵana emes, máńgilik alǵys aıtyp ótemiz. Sebebi, jaqsylyqty baǵalaı bilýge, oǵan jaqsylyqpen jaýap qaıtarýǵa tıispiz. Munyń ózi ózara syılastyq pen qurmetke jeteleıdi» - deıdi Farıt Aıýpov.

Sondaı-aq, Farıd Ǵalymuly ózderi qınalyp otyrsa da, taǵdyrdyń tálkegimen jer aýyp kelgen myńdaǵan adamdy aman alyp qalǵan qazaqtardyń sol bir rýhanı erligi eshqashan da umytylmaıtyndyǵyn jetkizdi. Merekemen kópshilikti quttyqtap, qazaq halqyna alǵys aıtty.

«Búgingi kúni Qazaqstan halqy tatý-tátti, birlikte, yntymaqta tirshilik etýde. Jer aýdarylǵan adamdardyń ózderi de, búgingi urpaqtary da Qazaqstandy Otanymyz dep sanady. Osynda ósip-ónip, el damýyna ózindik úlesterin qosyp keledi. Eldiń turaqtylyǵy men birligin nyǵaıtýǵa úles – ózderine qutty qonys bola bilgen elge degen qurmet dep bilemin. Alǵys aıtý kúni adamdardy jaqyndastyryp, syılastyqty arttyrady. Bul – talassyz shyndyq. Sondyqtan búgingi merekede qazaq halqyna alǵys aıta otyryp, barsha qazaqstandyqty osy mereıli merekemen quttyqtaımyn» - dedi ol.