Qazaq ǵalymy zertteý jumysyn AQSh-ta jalǵastyrady

ASTANA. QazAqparat - Ál-Farabı atyndaǵy Qazaq ulttyq ýnıversıtetiniń dárilik ósimdikterdi ǵylymı-zertteý ortalyǵy AQSh-taǵy Mıssısıpı ýnıversıteti ǵalymdarymen birlesip jumys isteýge kiristi, dep habarlaıdy QazAqparat.

Jaqynda zertteý ortalyǵynyń bazasynda QR Ǵylym jáne joǵary bilim mınıstri Saıasat Nurbek pen QazUÝ basqarma tóraǵasy Janseıit Túımebaevtyń qatysýymen ósimdik shıkizaty negizinde ınnovatsııalyq ónim ázirleıtin shaǵyn óndiris ashylǵan bolatyn.

Munda suranystaǵy ónimderdiń biri – tumaý jáne COVID-19 aýrýlaryna qarsy bıologııalyq belsendi qospa.

2020 jyly daıyndalǵan tabıǵı tunbanyń quramyna ókpeni qýattaıtyn, qaqyryq túsiretin, qandy suıyltatyn, qandaǵy maılardy joǵaltyp, qan aınalymyn jaqsartatyn, kúsh-qýat berip, uıqyny retteıtin qasıeti bar ósimdikter qosylǵan.

Ortalyq dırektory Janar Jeńis atalǵan qospanyń kovıdke belsendiligin tereń zertteý maqsatynda jýyrda Mıssısıpı ýnıversıtetine arnaıy bardy.

Osy sapar nátıjesinde endi QazUÝ bazasynda daıyndalǵan bıologııalyq ónim AQSh ýnıversıtetiniń zamanaýı zerthanalarynda jan-jaqty saralanyp, ózge syrqattarǵa emdik áseri anyqtalatyn boldy.

«Maqsatymyz – daıyndalǵan qospa quramyndaǵy negizgi bıologııalyq belsendi qosylystardy bólip alý, qurylymdaryn jetildirý jáne farmokologııalyq belsendiligin zertteý. Qazirgi tańda tumaý jáne COVID-19 aýrýlaryna qarsy qospanyń kovıdke belsendiligin tereń zertteý jumystaryn Mıssısıpı ýnıversıtetiniń ǵalymdarymen birge shákirtim, bizdiń ǵylymı qyzmetkerimiz Janna Aqjigitova birlesip atqarýda», – deıdi joba avtory, professor Janar Jeńis.

Ortalyq ǵalymdary emdik ósimdikterdiń qasıetterin zertteý jumystarymen 20 jyldan beri aınalysyp keledi.

Buǵan deıin tumaý men baýyr aýrýlarynan saqtaıtyn jáne ımmýnıtetti kóteretin qospalar jáne qandaǵy qant deńgeıin tómendetetin, qan qysymyn retteıtin, asqazan-ishek júıesiniń jumysyn jaqsartatyn jáne ımmýnıtetti kóteretin fıto-shaılar óndirildi.

Foto: t.me/gylym_jogary_bilim