Qazaq ǵalymy estý qabileti nashar balalardyń tilin shyǵaratyn ádisteme jasady

ASTANA. QazAqparat - Qazaqstanda teńdesi joq erekshe ádistemeni Sársen Amanjolov atyndaǵy ShQÝ «Dana bala» úzdiksiz jáne ınklıýzıvti bilim berý ortalyǵynyń joǵary bilikti logoped-defektology Raýan Baıchınov ázirledi, dep habarlaıdy QazAqparat.

Ǵylym jáne joǵary bilim mınıstrligi taratqan málimetke sensek, jas ǵalym avtorlyq quqyqpen qorǵalatyn obektilerge quqyqtar tizilimine málimet engizý jóninde kýálik alǵan.

Jobany daıyndaý kezinde tikeleı ǵylymı keńesshi bolǵan - pedagogıka ǵylymdarynyń kandıdaty, QR JAK dotsenti Kýlcharııa Kokkozeva.

«Kohlearly ımplanty bar mektep jasyna deıingi qazaq tildi balalardaǵy daýystyń ıntonatsııalyq qurylymdaryn zertteý» atty ǵylymı joba 2018 jyly bastalǵan.

Búgingi tańda 86 balaǵa zertteý júrgizildi.

Onyń jeteýi dybystar men sóıleýdi qabyldaý, dybysqa elikteý, sóz tirkesteri jáne qarapaıym sóılemder atty tórt kezeńnen turatyn qaıta ońaltýdan ótýde.

Joba avtorynyń aıtýynsha, ádisteme úsh jastan jeti jasqa deıingi balalarǵa arnalǵan.

Raýan Baıchınov osy ádispen eki jyldan beri oqytylyp júrgen balalardyń biri búginde sóılem qurap, sóılep júrgenin aıtady.

Taǵy bireýi kohlearly ımplant qoıǵaly dybystar men daýysqa eleńdemeıtin bolǵan.

Biraq eki aı boıy arnaıy ádistememen úıretilgen bala dybystardy jaqsy qabyldap, jaqsy estı bastaǵan. Degenmen, ol áli qaıta ońaltýdyń úsh kezeńinen ótý tıis.

Qazirgi kúni bul ádistemeni ShQO bilim basqarmasynyń oblystyq psıhologııalyq-medıtsınalyq-pedagogıkalyq keńes berý mekemesi, «Áleýmettik qyzmetkerler men eriktiler qaýymdastyǵy» qoǵamdyq uıymy jáne ýnıversıtet bazasynda ashylǵan «Dana bala» úzdiksiz jáne ınklıýzıvti bilim ortalyǵy qyzmetkerleri qoldanyp júr.

Foto: facebook.com/gylym.jogarybilim