Qazaq ǵalymdary jol qurylysy salasyndaǵy jańa ázirlemelerin usyndy

NUR-SULTAN. QazAqparat - Elordada «Jol qurylysyndaǵy ınnovatsııalyq ádister: Keleshegi men damýy» taqyrybynda halyqaralyq ǵylymı-tájirıbelik konferentsııa ótti, dep habarlaıdy QazAqparat tilshisi.

Halyqaralyq shara «Qazavtojol – Kaztraffic» halyqaralyq mamandandyrylǵan kórmesi aıasynda uıymdastyryldy. Al jyl saıyn dástúrli túrde uıymdastyrylatyn kórmede jol jáne turǵyn úı-kommýnaldyq sharýashylyǵy salasynda keńinen qoldanylatyn ónimder usynylǵan.

«Dál osy kórmeden kásiporyndarymyz ben memleket úshin úlken paıda bar. Bul jerde bizdiń klımattyq jaǵdaıymyzǵa saı keletin jańa tehnologııalar usynylǵan», - dedi BAQ ókilderine suhbat bergen «Ulttyq jol aktıvteriniń sapasy ortalyǵy» sharýashylyq júrgizý quqyǵyndaǵy RMK bas dırektory Zamır Saǵynov.

Onyń atap ótýinshe, kórmede jol qurylysy salasyndaǵy eń zamanaýı tehnologııalar usynylǵan. Olardyń qatarynda ózderiniń tyń ázirlemelerin usynǵan otandyq kásiporyndar da bar.

«Qazaq jol ǵylymı-zertteý ınstıtýty óz tehnologııasyn usynyp otyr. Ǵalymdar bizdiń kómirimizdiń bazasynda nanotehnologııalar engizgisi, kómirdi bıtýmǵa qospa retinde jáne jaǵarmaı materıaly retinde qoldanǵysy keledi. Bul tehnologııany engizý boıynsha tolyq syzba ázirlengen», - dedi ol.