Qazaq ǵalymdary eńbek bırjasynda tirkeýde turmaýy kerek - sarapshy

NUR-SULTAN. QazAqparat –Qazaqtyń ǵalymdary eńbek bırjasynda tirkelip, kezekte turmaýy kerek. Búgin Qazaqstandaǵy ǵylym kúnine oraı pikir bildirgen aýylsharýashylyǵy salasynyń tanymal sarapshysy «Shopan ata» ulttyq qoı ósirýshiler qaýymdastyǵynyń tóraǵasy Almasbek Sadyrbaev osylaı málimdedi.

«Búgin 12 sáýir – qazaq ǵylymynyń tól merekesi! Al qazir qazaq agroǵalymdary ne jasap jatyr? Qazirgi kúni qazaqtyń agroǵalymdary eńbek bırjasynda kezekte, tirkeýde tur. Qazaqstandaǵy 14 ǵylymı-zertteý ınstıtýtynyń ǵalymdary, agroǵalymdar eńbek bırjasynda kezekte eken. Agrarııa salasynyń magıstranttary, kandıdattar, PhD doktorlary – eńbek bırjasynda júr!.. Al bul bırjada olarǵa búgingi usynatyn jumys – kóshe sypyrý sekildi qoǵamdyq jumystar ǵana. Bul uıat nárse...», - deıdi Almasbek Sadyrbaev.

Onyń pikirinshe qazaqtyń ǵalymdary eshqashanda eńbek bırjasynda tirkeýde turmaýy kerek. «Qazaq ǵalymdary dál qazirgideı eńbek bırjasynda turatyn bolsa, onda biz qalaısha aýyl sharýashylyǵyn órkendetý, agroónerkásipti damytý týraly áńgime aıtamyz», - deıdi sarapshy.