Qazaq etin reseılik naryqqa shyǵarý úshin birqatar sharalar qolǵa alynbaq

ASTANA. Qarashanyń 6-sy. QazAqparat /Qanat Mámetqazyuly/  - Qazaqstandyq et pen et ónimderin Reseı naryǵyna shyǵarý úshin birqatar sharalar atqarylmaq. Búgin QR Parlamenti Senatynda «Agroónerkásip keshenin ındýstrııalandyrý mindetteri jáne bıýdjet qarajatyn tıimdi paıdalanýdy arttyrý» taqyrybyndaǵy parlamenttik tyńdaý barysynda

  Premer-Mınıstrdiń birinshi orynbasary Ómirzaq Shókeev osylaı málim etti, dep habarlaıdy QazAqparat.  

«Agroónerkásip keshenin ındýstrııalandyrý baǵdarlamasyn júzege asyrý aýyl sharýashylyǵy salasyndaǵy ónimder sapasynyń artýyna jaǵdaı týǵyzady. Máselen, et óndirý salasyn qarastyrsaq, búgingi kúni Qazaqstannyń eti úshin Reseı naryǵy áli de jabyq kúıinde tur. Bundaǵy sebep - qazaqstandyq ónimder reseılik qyzmet organdarynyń sapaǵa qatysty  talabyna sáıkes bolmaýda. Sondyqtan da, qazirgi kúni qazaqstandyq et ımporttalatyn elder talap etetin barlyq sanıtarlyq normalar saqtalynǵan zamanaýı bordaqylaý alańdaryn qurý, mal soıý jelilerin damytý sharalary qolǵa alynyp jatyr. «QazAgro» holdıngi arqyly Ulttyq qor qarajatyna mal bordaqylaý men soıý tsehtaryn, et óńdeý kásiporyndaryn qurý jumysy bastaldy. Qazirgi tańda elimizdiń túrli óńirlerinde osyndaı 5 jobany qarjylandyrý maquldandy», dedi ol. Ó. Shókeevtiń aıtýynsha, buǵan qosymsha qazaqstandyq et ónimderin reseılik organdardyń ońtaıly baǵalaýy úshin normatıvtik-quqyqtyq bazany qalyptastyrý jumystary da qolǵa alynǵan.

«Búgingi kúnniń ózinde et ónimderin sertıfıkattaýdy qazaqstandyq-reseılik mamandardyń birlesken komıssııalary arqyly júzege asyrý týraly qaǵıdatty kelisimshart jasaldy», dedi Premer-Mınıstrdiń birinshi orynbasary.