Qazaq elinde turatynymyzdy umytpaıyq – Máslıhat sessııasyn qazaqsha ótkizýdi usynǵan depýtat Nadejda Shýshanıkova

ÓSKEMEN. QazAqparat – Óskemen qalalyq máslıhatynyń depýtaty Nadejda Shýshanıkova máslıhat sessııasyn qazaq tilinde ótkizýdi usyndy, dep habarlaıdy QazAqparat tilshisi.

Keshe Óskemende VIII saılanǵan qala máslıhatynyń alǵashqy sessııa otyrysy ótken bolatyn.

Sonda bir mandatty №11 saılaý okrýgi boıynsha saılanǵan depýtat Nadejda Shýshanıkovanyń jasaǵan usynysy áleýmettik jelige tarap, dúıim jurttyń kóńilin súısintken.

Osy rette, QazAqparat tilshisi №36 orta mekteptiń qazaq tili men ádebıeti pániniń muǵalimi Nadejda Shýshanıkovany áńgimege tartyp kórgen edi.

«Ózim Shyǵys Qazaqstan oblysy Zaısan aýdanynyń týmasymyn. Es bilgeli qazaqsha sóılep kelemin. Muǵalim degen halyqpen tyǵyz jumys isteıtin adam ǵoı. Sondyqtan jurtty tolǵandyrǵan máselelerdi, qoǵamdaǵy ózekti taqyryptardy jaqsy bilemin. Sol úshin depýtattyqqa túsip kórýge bel sheshtim. Óskemendikterdiń qoldaýynyń arqasynda mine, depýtat ta atandym», - deıdi ol.

Budan bólek, ol qaladaǵy O. Bókeı atyndaǵy kitaphanada «Kel, sóıleseıik» atty qazaq tildi klýbynda sabaq beredi.

Osylaısha, oqýshylardan bólek eresekterge de memlekettik tildi meńgerýge kómektesýde.

«Máslıhat depýtattarynyń alǵashqy otyrysynda kelesi sessııany qazaq tilinde ótkizýge usynys jasadym. Sebebi biz qazaq elinde turatynymyzdy, memlekettik til – qazaq tili ekendigin umytpaýymyz kerek. Memlekettik mekemelerdegi jınalystar, sharalar tek qazaqsha ótýi tıis. Ókinishke qaraı, keıbir sheneýnikter qazaq tilinde eki sózdiń basyn qosa almaı jatady. Bul uıat qoı!», - deıdi Nadejda Shýshanıkova.