Qazaq dýblıajy mektebin ashýǵa usynys bar – Raýan Kenjehanuly

<p>ASTANA. KAZINFORM &ndash; Halyqaralyq &laquo;Qazaq tili&raquo; qoǵamy&raquo; qoǵamdyq birlestiginiń prezıdenti Raýan Kenjehanuly agenttik tilshisimen qazaq dýblıajynyń búgini jaı-kúıi týraly tildesken edi.</p>

- Raýan Kenjehanuly dýblıaj jasaýdyń basty talaptary qandaı ? 

- Stýdııalardan qazaq dýblıajy mektebin quraıyq degen usynys bar, qazir talqylanyp jatyr. Salanyń qyr-syryn biletin mamandardy daıarlaý ózekti másele. Dýblıaj jasaý ońaı sııaqty, biraq túpnusqa tilde aıtylǵan sózdi aýdarýdaǵy dálme-dáldik, dybystyń estilýi men aıtylýy, erinniń jybyrlaýy joǵary biliktilikti talap etedi», - dedi Raýan Kenjehanuly agenttik tilshisine suhbat bere turyp.

- Búgingi qazaq dýblıajynyń bet alysy qalaı ?

- Meniń oıymsha, Qazaqstanda televızııalyq dýblıaj kóp, áldeqaıda ilgeri ketken, óıtkeni Koreıanyń, Túrkııanyń teleserıaldarynyń aýdarmasy júrip jatyr. Ábden mashyqtanǵan, úırengen toptar paıda boldy. Osyndaı jumystar kóbeıgen saıyn onyń sapasy da arta túsedi. Bul shyǵarmashylyq sala sondyqtan onyń shegi joq, jetildire berýge bolady.

- Qazaq tilinde dýblıajdalǵan álemdik kıno premeralardyń kórermenderi az emes pe? Ony qalaı kóbeıtýge bolady ?

- Kınoteatrlar zaldyń kórermenge tolǵanyna mán beredi. Seansqa bılet satylmasa, adam kelmese ol fılm qolaıly ýaqytqa qoıylmaıdy, sondyqtan aldymen synaqtan ótedi. Bul jerde kınoteatrǵa ókpe aıtpaı, qolyn qaıyrmaǵan jón. Óıtkeni, bul kásip, onyń esebi bar. Bul máseleni sheshýdiń amaly – qazaq tilinde dýblıajdalǵan fılmdi kórýdi ózimizden bastap, belsendilik tanytý kerek. Mysaly «Oıjumbaq» mýltfılmi qazaq tilinde shyqqanda kúmán boldy, biraq ekinshi aptada kórermender legi eki ese artty. Sebebi kınoteatrlar qazaq tilindegi fılmderge suranys baryn, bıletter satylyp jatqanyn kórdi, sáıkesinshe seansty kóbeıtti, tipti, bılet tappaı qalǵan jaǵdaı boldy.

- Qazaq dýblıajy mamandarynyń kásibı deńgeıi qandaı ? Sapa syn kótere me ?

- Álemdik premeralardy aýdarýǵa kóptegen maman tartylady. Onyń ishinde til jáne medıa mamandary, kásibılik jaǵynan kúmán bolmaýy kerek, óıtkeni álemdik stýdııalardyń talaby óte joǵary, kezdeısoqtyq joq. Onyń ishinde tájirıbege, tehnıkalyq jabdyqqa jáne sapaǵa erekshe mán beredi. Rólderdi dýblıajdaýǵa kelsek, aldymen kastıng júredi, ol jerde úzdiktiń úzdigi tańdalady. Bizde qazaq tilinde dýblıaj jasaıtyn daýys ıeleri, ıaǵnı mamandar jetkilikti.

- Áńgimeńizge raqmet!