Qazaq dıasporasynyń jasampazdyq áleýeti óte joǵary - Dúnıejúzilik qazaqtar qaýymdastyǵy

ALMATY. 4 qarasha. QazAqparat - Almatyda «Qazaq dıasporasynyń jasampazdyq áleýeti: tarıh jáne qazirgi zaman» atty ǵylymı-tájirıbelik konferentsııa ótti. Ony uıymdastyrýshylar - Dúnıejúzilik qazaqtar qaýymdastyǵy (DQQ), Sh. Ýálıhanov atyndaǵy tarıh jáne etnologııa ınstıtýty, M.Áýezov atyndaǵy fılosofııa, saıasattaný jáne dintaný, ádebıet jáne óner ınstıtýty, sondaı-aq, QR Bilim jáne ǵylym mınıstrliginiń Ǵylym komıteti, dep habarlady DQQ baspasóz qyzmetinen.

Qazaqstannyń jeti qalasynan - Almaty, Astana, Óskemen, Qaraǵandy, Aqtóbe, Shymkent jáne Qostanaı qalalarynan baıandamalar kelip tústi. Konferentsııa respýblıkalyq mártebege ıe bolǵanyna qaramastan, oǵan Túrkııa, QHR, Mońǵolııa, Reseı jáne Qyrǵyzstannan kelgen ǵalymdar men jazýshylar qyzyǵýshylyq tanytty.

DQQ tóraǵasynyń birinshi orynbasary, «Týǵan til» halyqaralyq qoǵamdyq-saıası, ádebı-ǵylymı almanahynyń bas redaktory Talǵat Mamashevtyń atap ótýinshe, dıaspora boıynsha alýan túrli maqalalar jaryq kórgenimen, onyń jasampazdyq áleýetin anyqtaý máselesi eshqashan pánaralyq zertteýdiń nysany bolǵan emes. Qazaqtardy tarıhı otanyna qaıtarýǵa memlekettik qoldaý kórsetilgenine qaramastan, onyń sandyq jáne sapalyq quramyn anyqtaý ǵylymı zertteýler men saraptamalyq baǵalaýdyń kemshin tusy bolyp qalyp keledi.

Osylaısha, ǵylymı ádebıette jáne dıssertatsııalarda sheteldik qazaqtar jóninde málimetterdiń alshaqtyǵy úlken - úsh mıllıon adamnan alty mıllıon adamǵa deıin. Munyń bir sebebi - ǵylymı jáne qoldanbaly jobalarǵa memlekettik tapsyrys ákimshileriniń etnıkalyq qazaqtar tyǵyz ornalasqan ǵylymı ekspedıtsııalar rólin jete baǵalamaýy. Sondaı-aq, memlekettik shekaralarmen bólingen bir halyqtyń tarıhyn qalypqa keltirýdiń júıeli tásili ustanylmaıdy. IV Dúnıejúzilik qazaqtar quryltaıynda QR Prezıdenti birneshe mınıstrlikterge sheteldegi qazaq dıasporasy boıynsha ǵylymı ekspedıtsııa uıymdastyrý jáne ótkizý jóninde naqty tapsyrma qoıýy kezdeısoq emes.