Qazaq dalasynyń Shyńǵys han men onyń izbasarlary ımperııasynyń júıesindegi XII-XIV ǵasyrlardy qamtıtyn tarıhy barynsha qadala nazar aýdarýdy talap etedi - M.Tájın
«Qazaq dalasynyń Shyńǵys han men onyń izbasarlary ımperııasynyń júıesindegi XII-XIV ǵasyrlardy qamtıtyn tarıhy barynsha qadala nazar aýdarýdy talap etedi. Altyn Ordanyń, orda handarynyń tarıhy - Qazaq dalasynyń qalyptasý satysynda turǵan jańa orys memleketimen belsendi qarym-qatynasy bastalǵan kezeń de óte mańyzdy. Ókinishke oraı, qazirgi tarıhnamada eýropatsentrızmniń yqpalymen bir-birimen kereǵar kúshter - kóshpeliler («varvarlar») men otyryqshy halyqtar («órkenıettiler») kúresýmen ótken degen túsinik basym. Alaıda, ýaqyt óte kele zertteýshiler mundaı túsiniktiń durystyǵyna barǵan saıyn kóbirek kúdik keltire bastaýda», - dedi ol.
M.Tájınniń atap ótýinshe, túrki-slavıan ózara baılanystarynyń tarıhy tek qana soǵystardan, áskerı jeńister men jeńilisterden turmaıdy. Bul eń aldymen sanqyrly saýda, saıası, áskerı, mádenı ózara baılanystardyń tarıhy ekendigi esten shyǵaryla beredi.
«Nege ekeni belgisiz, ókinishke oraı, biz ózderimizdiń mádenıetterimiz ben órkenıetterimizdiń til tabysqan tustaryn attap ótip, nazardan tys qaldyramyz. Biz tek qaqtyǵystardy zertteımiz, sóıtemiz de búgingi zamannyń súıinishi men kúıinishin ótken kúnge kóshire salamyz, bulaı etý jónsiz jáne bul kásibılikke de jatpaıdy. Qazaqtar Eýrazııanyń eń baıyrǵy avtohtondy halyqtarynyń biri ekeni sózsiz. Sonymen birge, Qazaqstannyń tarıhy osy jerdi keıinirek mekendegen, birqatary erkinen tys qonystanǵan basqa da etnostyq toptardyń da tarıhy. Elimizdiń polıetnıkalyǵyn qalyptastyrýda bul úderisterdi biz obektıvti túrde zerdeleýimiz qajet. Qazaqstannyń tarıhy - bul bizdiń ortaq tarıhymyz», - dep túıindedi Memlekettik hatshy.