Qazaq dalasyn zerttegen frantsýz tarıhshysynyń eńbekteri qaıta basylady

ASTANA. QazAqparat - Qazaq dalasyn zerttep, ǵylymı muralar qaldyrǵan frantsýzdyq tarıhshy Iosıf Kastaneniń eńbekterin qaıta basyp shyǵarý josparlanýda. Bul týraly Halyqaralyq Túrki akademııasynyń (TWESCO) basshysy Darhan Qydyráliniń Frantsııanyń Qazaqstan Respýblıkasyndaǵy Tótenshe jáne ókiletti elshisi Fılıpp Martınemen kezdesýi barysynda aıtyldy, dep habarlaıdy QazAqparat.

TWESCO saıtynda málim etilgendeı, kezdesý barysynda D.Qydyráli akademııa atqaryp jatqan jumystar týraly aıtyp berdi.

Búginde TWESCO bedeldi halyqaralyq uıymǵa aınalyp otyr. Akademııa ıÝNESKO, ISESKO syndy birqatar uıymdarmen tyǵyz qarym-qatynas ornatqan. Uıym jetekshisi óz sózinde bıylǵy sáýir aıynda TWESCO Qazaqstan Prezıdentiniń «Rýhanı jańǵyrý» baǵdarlamasy aıasynda ıÝNESKO-nyń Parıj qalasyndaǵy shtab-páterinde «Rýhanı jańǵyrý jáne murany nasıhattaý: joıylý qaýpindegi túrki tilderi» atty halyqaralyq forým ótkizgenin atap ótti.

Óz kezeginde Fılıpp Martıne Frantsııa tarapy akademııa jumysyna qyzyǵýshylyq tanytyp otyrǵanyn tilge tıek etti.

Sondaı-aq taraptar Túrki akademııasy men Frantsııadaǵy INALCO (Shyǵys tilderi men órkenıetiniń ulttyq ınstıtýty) ǵylymı mekemeleri arasynda baılanys ornatý, yntymaqtastyqty damytý jáne ortaq jobalar jasaý, birikken jobalar aıasynda kitaptar shyǵarý sııaqty birqatar jaıttardy talqylady.

Atap ótilgendeı, birge uıymdastyrylatyn ortaq jobalar arasynda I.Kastane sııaqty qazaq dalasyn sharlap, kóptegen ǵylymı muralar qaldyrǵan belgili tulǵalardyń eńbekterin qaıta basyp shyǵarý da bar.