Qazaq bolý úlken maqtanyshqa aınaldy - Darhan Qydyráli

ASTANA. QazAqparat - Halyqaralyq Túrki akademııasynyń tóraǵasy, «Egemen Qazaqstan» gazetiniń basqarma tóraǵasy Darhan Qydyráli Prezıdenttiń tyń áleýmettik bastamalaryn - memlekettiń halyqqa jasaǵan aıryqsha qamqorlyǵy dep biletinin málim etti, dep habarlaıdy QazAqparat tilshisi.

«Azattyqtyń araıly tańynan kóshińiz quıyldy, jurtyńyz jıyldy. Oıdaǵy ornap, kóńil jaılandy, bereke-birligi bekem baıtaǵymyzǵa baqyt baılandy. Eń bastysy - qazaq bolý úlken maqtanyshqa aınaldy. Qazirgi tańda taǵdyrsheshti tarıhı isterdiń bel ortasynda júrdi. Ózegin ózińiz salyp bergen úrdis jalǵasa beredi dep senemiz», - dedi Darhan Qydyráli «Nur Otan» partııasynyń kezekti XVIII sezinde.

Darhan Qydyráli óz sózinde el gazeti «Egemen Qazaqstan» gazetine aýyl turǵyndarynan kóptegen hattar keletinin aıtyp ótti.

«Qarapaıym oqyrman kóbine shalǵaıdaǵy aýyldyń jaı-kúıi men áleýmettik máseleler týraly jazady. Sondyqtan, búgin áleýmettiń áleýetin arttyrýǵa qatysty basa aıtqan baǵdarly sózińiz - halyqtyń az qamtylǵan bóligin qoldaý, tabysy tómen azamattardyń baspana máselesin sheshý, óńirlerdi keshendi damytý týraly tapsyrmańyz kópshiliktiń kókeıinen shyǵyp, kóńil tórinen oryn aldy dep oılaımyz. Bıýdjet salasyndaǵy qyzmetkerlerdiń eńbekaqysyn kóterý týraly tapsyrma tapsyrmańyz mıllıondaǵan azamattarymyzdy qýanyshqa bóleıdi. Ataýly áleýmettik kómek alatyndardyń qatarynyń da artýy da mańyzdy. Bul - kópbalaly otbasylarǵa úlken demeý bolary anyq», - dedi ol.

«Egemen Qazaqstan» gazetiniń basqarma tóraǵasy «Baqytty otbasy» jobasy aıasynda partııa Prezıdenttiń tapsyrmalaryn oryndaýy kerektigin atap ótti

«Sizdiń bastamańyzben qolǵa alynǵan «Aýyl - el besigi» atty joba da aýylda turatyn aǵaıyn úshin asa qajetti dep bilemiz. «Qutty meken» partııalyq jobasy aıasynda «Nur Otan» óńirlerdi damytý, joldardy jóndeý, halyqty aýyz sýmen, kógildir otynmen qamtamasyz etý týraly mindetterdi júzege asyrýǵa úles qosady dep oılaımyz. Aıta keterlik jaıt, mundaı áleýmettik keshendi qoldaý álemniń damyǵan elderinde kezdese bermeıdi. Sondyqtan, biz muny - memlekettiń halyqqa jasaǵan aıryqsha qamqorlyǵy dep bilemiz», - dedi Darhan Qydyráli.

Halyqaralyq Túrki akademııasynyń tóraǵasy «Nur Otan» partııasynyń qazaq halqynyń tilin, tarıhyn, dástúrlerin, gýmanıtarlyq jáne ımandylyq qaǵıdattaryn elimizde turatyn barlyq etnostyq toptardyń arasynda keńinen nasıhattaý týraly bastamasy - jastardy patrıotızmge tárbıeleýmen birge, ulttyq biregeılikti qamtamasyz etedi dep sanaıtynyn jetkizdi.

Eske sala ketsek, elordadaǵy Táýelsizdik saraıynda Elbasy Nursultan Nazarbaevtyń tóraǵalyǵymen «Nur Otan» partııasynyń kezekti XVIII sezi ótip jatyr.