Qazaq boksshy Qytaı chempıonatynda top jardy

ASTANA. QazAqparat - Qytaıdyń Shyńjań avtonomııalyq ólkesinde týyp-ósken ulty qazaq boksshy Toqtarbek Tańathanuly el chempıonatynda top jardy, dep habarlaıdy QazAqparat.

Qytaılyq Jenmın Jıbao basylymynyń habarlaýynsha, bul dodada bokstan Shyńjań ólkesi erler quramasy 8 medal enshilep (2 altyn, 1 kúmis, 5 qola), toptyq esepte 1-orynnan kórindi.

75 kg salmaqta synǵa túsken Toqtarbek Tańathanuly aqtyq synda Anhoı provıntsııasy atynan synǵa túsken Hýan ıAnhýıdy tize búktirip, óz salmaǵynyń chempıony atandy. Sondaı-aq, ol 2018 jyly Indonezııanyń astanasy Djakartada ótetin Jazǵy Azııa oıyndaryna joldama aldy.

Aıta keteıik, Toqtarbek Tańathanuly ótken jyly XIII kezekti jazǵy Jalpyqytaı spartakıadasynda tóreshilerdiń ádiletsiz sheshimimen kúmis medal enshilegeni týraly jazǵan bolatynbyz. Sondaı-aq, 2018 jyly qańtar aıynda qandasymyz 2017 jylǵy qytaıdyń «Boks koroli» chempıonatynda qarsylas shaq keltirmeı, «korol» chempıondyq beldigin jeńip alǵan bolatyn.