Qazaq boksshylary kemi bir altynmen oralady – Qanat Islam

<p>ASTANA. KAZINFORM &mdash; Belgili kásipqoı boksshy Qanat Islam qazaq boksshylary Parıjde ótetin XXXIIІ Jazǵy Olımpıada oıyndarynan kemi bir altyn alatynyna senimdi. Bul týraly ol Kazinform tilshisine bergen suhbatynda atap ótti. Sonymen qatar barlyq quramaǵa sáttilik tiledi.</p>

«Olımpıada oıyndaryn taǵatsyzdana kútip júrmiz. Osyǵan deıingi Olımpıada oıyndarynda qazaq boksshylary júldesiz oralmaǵan. Kemi bir altynmen keletin. Alaıda, Tokıoda altynsyz qaldyq. Jigitterimiz bıyl sol olqylyqtyń orynyn toltyrady dep senemin. Qazaq boksshylary kemi bir altyn alady. Bizdiń jigitterdiń barlyǵy óz salmaqtarynda top jaryp, osyǵan deıingi álemdik dodalarda el namysyn abyroımen qorǵap júrgen sańlaqtar. Eshkimdi bóle jarmaıyn. Barlyǵy júldege laıyqty jigitter», - dedi Qanat Islam.

Sondaı-aq, tek boksshylarǵa ǵana emes, jalpy Olımpıadaǵa attanǵan barlyq quramaǵa sát sapar tiledi.

«Sportshylarymyzdyń aldy Olımpıadaǵa attanyp barady. Men tek boksshylarymyzǵa ǵana emes, barlyq ulttyq qurama múshelerine sát-sapar tileımin. Júldelerińiz kóp bolsyn, qazaqtyń kókbaıraǵyn Parıj tórinde jelbirete berińizder degim keledi», - dedi boksshy.

Aıta keteıik, Qazaqstan quramasy Olımpıada oıyndaryna sporttyń 25 túrinen 92 joldama jeńip aldy.

Frantsııa astanasy Parıj qalasynda ótetin XXXIII jazǵy Olımpıada oıyndary 26 shilde men 11 tamyz aralyǵyna belgilengen. 

Oıynǵa álemniń 205 elinen 10 500 sportshy qatysady. 

Onda 32 sport túrinen 329 medal jıyntyǵy sarapqa salynady.