Qazaq boksyna úlken reforma qajet - Boks federatsııasynyń prezıdenti

<p>PARIJ. KAZINFORM &ndash; Frantsııa astanasy Parıj qalasynda ótip jatqan Olımpıada oıyndarynda QR Boks federatsııasynyń prezıdenti Shahmurat Mútálip elimizdiń boks salasyna úlken ózgerister jasalatynyn aıtty.</p>

«Ózimizden jaýapkershilikti alyp, aqtalatyn jaıymyz joq. Bárimizden kiná bar. Federatsııa tarapynan da, jattyqtyrýshylar tarapynan da aǵattyq ketti. Qaı jerden qandaı aǵattyqtar bolǵanyn kórdik. Endi jibergen qateliktermen jumys istep, nátıje shyǵarý qaldy. Qazir biz bir sheshimge kelip, qazaq boksyna reforma júrgizýdi kózdep otyrymyz», - dedi QR Boks federatsııasynyń prezıdenti.

Sonymen qatar, ol aldaǵy ýaqytta jasóspirimderden bastap, Qazaqstan chempıonatyna deıingi jarystarda ár oblys birinshilikterinde ádil, taza irikteý júrgiziletini týraly da atap ótti.

«Aldaǵy ýaqytta jas óspirimderden bastap, Qazaqstan chempıonatyna deıingi jarystarda ár oblys birinshilikterinde ádil, taza irikteý júrgizip, boksshylarymyzdyń da deńgeılerin kóterip, jańa baǵytta jumystar jasaımyz. Kýba, AQSh sııaqty elderden mamandar aldyryp, ózgerister engizýdi josparlap otyrmyz. Endi aldaǵy Azııa birinshilikterinde, álem chempıonattarynda, bar kúshimizdi salyp eńbek etip, jańa qyrymyzdan kórinýge tyrysamyz. Kelesi Olımpıada oıyndaryna tyńǵylyqty daıyndyqpen barýǵa kúsh salamyz», - dedi Boks federatsııasynyń prezıdenti Shahmurat Mútálip.