Qazaq balýandary álem chempıonatyn sátti bastady

<p>ASTANA. KAZINFORM &ndash; Búgin Tıranada (Albanııa) 23 jasqa deıingi balýandar arasyndaǵy álem chempıonaty bastaldy. Birinshi jarys kúni bózkilemge shyqqan balýandarymyz alǵashqy beldesýlerin sátti bastady.</p>

Álem birinshiligin birinshi bolyp grek-rım kúresiniń ókilderi bastady. Qazaq balýandary arasynda birinshi bolyp kilemge shyqqan Din-Muhamed Qoshqar (67 keli) Lıtva balýany Adomas Grıgalıýnastan 5:1 esebimen basym tústi.

Endi ol 1/8 kezeńde Danıal Agaevpen (Beıtarap atlet) kúsh synasady.

Al 60 keli salmaqta el namysyn qorǵap jatqan Dosjan Ótepqalıev te alǵashqy qarsylasyn jarys jolynan taıdyrdy. Ol birinshi beldesýinde Saýd Arabııasynan kelgen Hasan Muhammed Ál-hartıdy aıqyn basymdyqpen jeńdi. Otandasymyz bir jarym mınýttyń ishinde 8-0 esebimen jeńiske jetti!

Endi ol 1/8 kezeńde qytaılyq sportshymen kim myqtyny anyqtaıdy.

Búgin taǵy úsh balýanymyz jarys jolyna shyǵady. Naqtyraq aıtsaq, 72 kelige deıingi salmaqta Mereı Máýlithanov, 82 kelige deıingi salmaqta Almır Tólebaev jáne 97 kelige deıingi salmaqta Erzat Erlanov el namysyn qorǵaıdy.

Esterińizge sala keteıik, osyǵan deıin qazaqstandyq balýandardyń alǵashqy qarsylasy anyqtalǵany týraly jazǵan bolatynbyz.