Qazaq balalary Ulybrıtanııada ulttyq qundylyqtarymyzdy nasıhattady

LONDON. QazAqparat - Ulybrıtanııa mektepterinde Ulttar kúni atalyp ótip jatyr. Oqýshylar synyptastaryna óz memleketteri týraly aqparat berip, salt-dástúrlerimen tanystyryp jatyr. Ata-anasymen Londonda ýaqytsha turyp jatqan qazaq balalary da osyndaı bir sharaǵa qatysyp, ulttyq qundylyqtarymyzdy nasıhattady, dep habarlaıdy QazAqparat tilshisi.

Ulybrıtanııa mektepterindegi oqý jyly shildeniń aıaǵynda ǵana bitedi. Sońǵy toqsandaǵy aıtýly sharalardyń biri - Ulttar kúni.

Bul kúni oqýshylar tańerteńnen ulttyq kıimderin kıip, synyptastaryna týǵan jerleri týraly aqparat beredi.

Sabaǵy aıaqtalǵan soń aýlaǵa shyǵyp, ata-analarymen birge dastarhan jaıady.

«Baýyrsaq? Dámi erekshe eken. Raqmet. Maǵan qatty unady. Buryn-sońdy mundaı ǵajap nan jep kórmedim. Ulttyq kıimderińizdi kórip te tánti boldym», - deıdi Somalı azamaty Sofııa Hasan.

Káýsar men Almasbek - ata-anasynyń jumys babymen Londonda ýaqytsha turyp jatqan qazaqstandyq balalar.

Olar Hıý-Mıddlton atyndaǵy bastaýysh bilim berý mekemesinde besinshi jáne altynshy synyptarda oqıdy.

Mektebindegi jalǵyz qazaq ultynyń ókilderi. Aǵaıyndylar «Balapan» telearnasynan shyǵatyn «Mıss Káýsar» habarynyń júrgizýshileri.

Kógildir ekrannan qazaq balalaryna aǵylshyn tilin úıretse, Londondaǵy sheteldikterge týǵan jerin nasıhattap júr.

«Ulttyq kıimderińizdiń matasy men oıý-órnegi óte unady. Dástúrlerińizdi tamasha dáripteıdi ekensizder. Men buǵan deıin elderińizde eshqashan bolǵan joqpyn. Biraq Qazaqstannyń almanyń otany ekenin jáne bul jemis túrin búkil álemge taratqan memleket ekenin bilemin», deıdi Angola azamaty Helena Melo.

Ulybrıtanııa - kópultty jáne násildi memleket. Munda negizinen aǵylshyn, shotland, ırland jáne ýels halqy mekendeıdi.

Olardan bólek burynǵy otar memleketterinen qonys aýdarǵandardyń urpaqtary jáne osynda jumys babymen kelgender turady.

Tili, dini jáne dástúrleriniń saqtalýyna erekshe mán beriledi.