Qazaq armııasynda 12 myńnan astam áıel qyzmet etedi
Saltanatty is-sharaǵa qatysýshylarmen tanysqan qorǵanys vedomstvosynyń basshysy jıyndaǵylardy Halyqaralyq áıelder kúnimen quttyqtap, el Qarýly kúshterinde kúrdeli ári abyroıly áskerı qyzmette júrgen áıelderge shyn júrekten alǵys bildirdi.
Mınıstr Qazaqstan áskerinde 12 myńnan astam áıel qyzmet etetinin, onyń ishinde 800-ge jýyq ofıtser, 6 myńnan asa kelisimshart boıynsha áskerı qyzmetshi jáne 5 myń azamattyq personal qyzmet etetinin aıtty. «Polkovnık» áskerı sheninde 25 áıel bolsa, 11 názik jandy basshylyq laýazymdarda, 55-i memlekettik nagradalarmen marapattalǵan.
– Áskerı qyzmetshi áıelder oqý-jaýyngerlik mindetterdi er-azamattarmen teń oryndaı otyryp, adal qyzmet atqaryp júr. Olardyń arasynda teńizshiler, desantshylar, barlaýshylar, mergender, mehanık-júrgizýshiler de bar. Kásip tańdaýda árbirińizdiń óz jolyńyz, óz taǵdyryńyz bar, – dep atap ótti mınıstr.
Beıresmı áńgime barysynda general-polkovnık Rýslan Jaqsylyqov áıelderdiń otbasyndaǵy ál-aýqatty saqtaýǵa, qoǵamdaǵy kelisim men turaqtylyqty nyǵaıtýǵa qosqan úlesin erekshe atap ótti.
QR Ulttyq qorǵanys ýnıversıteti «Bas shtab akademııasy» fakýltetiniń memlekettik, áskerı basqarý jáne quqyq kafedrasynyń aǵa oqytýshysy podpolkovnık Aısulý Moldasheva sóz sóıledi. Pedagog jedel-taktıkalyq deńgeıdegi ofıtserlerdi daıarlaýǵa baǵyttalǵan oqytýshylyq qyzmetiniń baǵyty týraly aıtyp berdi.
Áskerde qyzmet pen sport qatar júredi. Bul salada áskerı qyzmetshi-sportshylar Qarýly kúshterdiń bedelin arttyrýǵa edáýir úles qosýda. Oǵan Sport komıteti – Ortalyq sport klýby boks komandasynyń aǵa mamany Qarýly kúshter qyzmetkeri Angelına Lýkas aıqyn mysal bola alady. Naýryz aıynyń basynda kásipqoı boksshy A. Lýkas sharshy alańda jetinshi márte jeńiske jetip, Taılandtan elge oljaly oraldy. Angelına sportshylarǵa kórsetken jan-jaqty qoldaýy úshin mınıstrge alǵys aıtty.
55765 áskerı bóliminiń áskerı baılanysshysy efreıtor Tatıana Skokova shyrqaǵan «Arys jaǵasynda» áni qatysýshylardyń bárine tamasha tartý boldy. T. Skokova óz kezeginde árbir názik áıeldiń boıynda bir qolymen besikti, bir qolymen álemdi terbetetin kúshi bar ekenin atap ótti. Bul kúsh-jiger áıelderge qamqor ana, abzal jan jáne óz isiniń mamany bolýǵa yqpal etedi.
Shara sońynda general-polkovnık Rýslan Jaqsylyqov qyz-kelinshekterge quttyqtaý hattar men gúl shoqtaryn tabys etti. Mańyzdy kezdesýden estelik retinde olar Qorǵanys mınıstrimen birge fotosýretke tústi.