Qazaq-alman ýnıversıtetiniń úlgisimen qurylýy múmkin – Saıasat Nurbek Qazaq-frantsýz JOO-sy týraly

<p>Ǵylym jáne joǵary bilim mınıstri Saıasat Nurbek elimizde ashylatyn Qazaq-frantsýz ýnıversıtetiniń qalaı qurylatyny týraly pikir bildirdi, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Mınıstrdiń aıtýynsha, bul joǵary oqý orny Qazaq-alman ýnıversıtetiniń úlgisimen qurylýy múmkin.

«Biz jeke jumys tobyn quryp, máseleni sol alańda talqylaımyz. Sondaı-aq óńirlerdegi joǵarǵy oqý oryndarynda myqty frantsııalyq ýnıversıtetterdi tarta otyryp, zertteý kafedralaryn ashý máselesin talqylaımyz. Frantsııalyq ýnıversıtetterden kelgen delegatsııalar da bizdiń elde júr. Almaty qalasynda 3 kún boıy eki el rektorlarynyń forýmy ótedi», - dedi mınıstr.

Eske salaıyq, Frantsııa Prezıdenti Emmanıýel Makron resmı saparmen Qazaqstanǵa keldi. Bul – Frantsııa basshysynyń Astanaǵa jaýapty sapary. Ótken jyldyń 29-30 qarashasynda Qazaqstan Prezıdenti Qasym-Jomart Toqaev Parıjde bolǵan edi. Kelissózder nátıjesinde saýda-ekonomıkalyq, aeroǵarysh, mashına jasaý, taý-ken ónerkásibi, agroónerkásip, atom jáne energetıka salalaryndaǵy strategııalyq seriktestikti nyǵaıtýǵa baǵyttalǵan 35 qujatqa qol qoıyldy. Olardyń arasynda Joǵary bilim jáne ǵylymı zertteýler salasyndaǵy yntymaqtastyq nıeti týraly deklaratsııa da boldy. Qazaqstan men Frantsııa bilim berý jáne ǵylymı ortalyqtar arasyndaǵy baılanystardy belsendi damyp jatyr. 2014 jyldan bastap Sorbonna-Qazaqstan ınstıtýty jumys isteıdi. Frantsııanyń úsh bilim oshaǵy – Pýate ýnıversıteti, Lotarıngııa ýnıversıteti jáne Strasbýrg ýnıversıtetimen seriktestik belsendi damyp keledi.

Frantsııa prezıdenti Astanaǵa sapary aıasynda elimizdegi bedeldi joǵary oqý oryndarynyń biri – Maqsut Narikbayev University stýdentterimen jáne oqytýshylarymen kezdesti. Suraq-jaýap formatynda E. Makron men stýdentter Qazaqstan men Frantsııa arasyndaǵy yntymaqtastyqtyń perspektıvalyq baǵyttaryn talqylady.