Qazaq Adaı jylqysyn asyl tuqymdy mal retinde taný kerek - Prezıdent

AQTAÝ. QazAqparat - Mańǵystaýdyń tabıǵaty túıe ósirýge óte qolaıly ekeni belgili. Qazir oblysta 90 myńǵa jýyq túıe bar. Bul derekti Prezıdent Qasym-Jomart Toqaev aıtty, dep habarlaıdy QazAqparat.

«Túıe ónimderine búkil elimizde suranys óte joǵary. Odan alynatyn shıkizatty tereń óńdeý jumysyn qolǵa alý qajet. Bul ónimniń túrin kóbeıtedi ári onyń baǵasyna oń yqpal etedi. Úkimetke túıe sharýashylyǵyn qoldaýǵa arnalǵan memlekettik sharalardy kúsheıtý máselesin pysyqtaýdy tapsyramyn. Bul salaǵa sýbsıdııa berý joldaryn da qarastyrý kerek», - dedi Memleket basshysy.

Ol halqymyz úshin jylqynyń orny qashanda erekshe ekenine toqtaldy. Qazaq Adaı jylqysyn Mańǵystaýdyń biregeı baılyǵy deýge bolady. Bul arǵymaqtar shólge erekshe shydamdy, alys jolǵa tózimdi ekenin bári biledi.

« Mańǵystaý tulparlary alysqa shabatyn halyqaralyq marafon jarystarynda árdaıym báıge alyp júr.

Jaqynda ótken «Uly dala joryǵynda» oblys shabandozdary jeke-dara ozyp keldi. Qazaq Adaı jylqysyn álemge tanyta alsaq, bul bizdiń taǵy bir tamasha brendimizge aınalady. Sondyqtan, Úkimetke ony ǵylymı túrde asyl tuqymdy mal retinde taný jáne kóbeıtý úshin tıisti jumystardy jedel qolǵa alýdy tapsyramyn», - dedi Memleket basshysy.