KazAID agenttigi qandaı jobalarmen aınalysady

NUR-SULTAN. QazAqparat - QR Syrtqy ister mınıstrliginiń erekshe tapsyrmalar jónindegi Elshisi Rápil Joshybaev taıaýda qurylatyn KazAID damý resmı kómek kórsetý salasyndaǵy agenttiktiń qyzmeti jáne bıýdjetine qatysty málimettermen bólisti, dep habarlaıdy QazAqparat tilshisi.

«Uıym kommertsııalyq emes, ol tabys tabýdy kózdemeıdi. Kez kelgen aktsıonerlik qoǵamdy qurý úshin jarǵylyq kapıtal bar. Ol shamamen 138 mln teńgeni quraıdy. Ózimizdiń jyljymaıtyn múlkimiz. Ony da jarǵylyq kapıtalǵa kirgizýimiz qajet», - dedi ol Syrtqy ister mınıstrliginde ótken baspasóz máslıhatynda.

Onyń atap ótýinshe, bastapqyda atalǵan agenttik jumysyna 15 maman tartylady.

«Olar - negizinen Syrtqy ister mınıstrliginde jumys isteıtin, tildik jáne halyqaralyq bıznes salasynda daıyndyqtan ótken mamandar. Odan arǵy damýǵa qatysty aıtar bolsam, biz 25 adamǵa deıin jetkizýdi josparlap otyrmyz. Bul da jarǵylyq kapıtal aıasynda bolady», - dep túsindirdi QR SІM ókili.

Sonymen qatar ol jańadan qurylatyn agenttik naqty qandaı jobalarmen jumys isteıtindigin atap ótti.

«Biz halyqaralyq uıymdarmen jáne ózge de jobalarmen jumys isteıtin bolamyz. Qazir áleýmettik sıpattaǵy birneshe joba bastalǵaly tur. Negizinen bul jumystar Ortalyq Azııa óńirinde bolady. Bizdiń dıaspora turatyn, tilimiz taralatyn eldermen jumys júrgizemiz. Stýdentter daıyndaý, bilim berý, onyń ishinde medıtsınalyq bilim berý máseleleri bar», - dedi Rápil Joshybaev.