«QazAgroQarjy» kompanııasynyń basshysy N. Málelov Atyraýda qulaǵan jylyjaıǵa qatysty túsinikteme berdi
«Keıingi kezde buqaralyq aqparat quraldarynda jıi aıtyla bastaǵan «AtyraýAgroÓnimderi» sharýashylyq qojalyǵyn «QazAgroQarjy» aktsıonerlik qoǵamy qarjylandyrǵan. Oǵan qajetti qarjy ulttyq qordan emes, 2008 jyldyń qarjysynan bólindi. Joba boıynsha «QazAgroQarjy» Rozmetov myrzanyń ózi kórsetkendeı 500 mıllıon emes, 202 mıllıon teńge tóledi. Taǵy 50 mıllıon teńgeni jylyjaı saldyryp jatqan azamattyń ózi tóledi», - dedi N.Málelov.
Onyń sózinshe, jylyjaıǵa qajetti dúnıelerdi tasymaldaýshynyń «QazAgroQarjy» aktsıonerlik qoǵamy ókilderiniń keńesi negizinde tańdap alynǵandyǵy shyndyqqa sáıkespeıdi. «Óıtkeni «AtyraýAgroÓnimderi» kompanııasy bergen ótinish pen bıznes-jospar bar. Onda qurylǵylardy ákelýshi anyq kórsetilgen jáne Rozmetov myrzanyń qoly qoıylǵan. Іstiń aq-qarasyn anyqtaý qajet bolsa biz bul qujattardy da kópshiliktiń nazaryna usynamyz»,-dedi «QazAgroQarjy» aktsıonerlik qoǵamynyń basshysy.
Budan ári ol osy oqıǵa boıynsha qazirgi tańda qalyptasqan jaǵdaı jóninde baıandady. Onyń sózinshe, túrikterdiń «Oztoprak» kompanııasy men lızıng alýshy «AtyraýAgroÓnimderi» arasynda kelisim jasalǵan. Sonymen qatar «AtyraýAgroÓnimderi» men «QazAgroQarjy» kompanııalarynyń arasynda qarjy lızıngi týraly kelisim de bar. Bul kelisimge sáıkes, «QazAgroQarjy» qajetti qurylǵylardy jetkizýi qajet bolatyn. Al «AtyraýAgroÓnimderi» qurylys jumystarynyń daıyndyǵy men keshendi iske qosý isine jaýap berýi qajet edi. Búgingi tańda qajetti qurylǵylar ornatylǵan, al lızıng alýshy qurylys jumystaryna daıyndyqty qamtamasyz ete almady.
Osy rette «AtyraýAgroÓnimderi» kompanııasy men merdigerlik kompanııa arasynda arnaıy kelisim bar ekendigin aıta ketý kerek. Lızıng berýshi osy oqıǵa boıynsha tıisti sharalar qoldanyp otyr. Naqtyraq aıtqanda, atalmysh kompanııa qazir túrikterdiń «Oztoprak» kompanııasyn sotqa berdi. Al «QazAgroQarjy» aktsıonerlik qoǵamynyń paıdasyna sheshilgen sot qaýlysy dıplomatııalyq arnalar arqyly Túrkııaǵa jiberildi. Buǵan qosa «QazAgroQarjy» ujymynyń basshylary Vladımır Rozmetovke atalǵan isti birlesip júzege asyrý jóninde usynys jasaǵan, alaıda ol bul bastamadan bas tartqan. Sonymen qatar, «AtyraýAgroÓnimderi» kompanııasyna jylyjaı qurylysyn aıaqtap, ony paıdalanýǵa berý úshin jeńildikti stavkalar negizinde qarjylandyrý sharasy usynyldy. Bul usynys ta aıaqsyz qaldy. Qazirgi tańda jylyjaı kesheniniń qurylǵylary V.Rozmetovke berilgen.
Brıfıngte N.Málelov jylyjaı kesheniniń aqaýlary bar ekendigin aıtty. Óıtkeni merdigerler qurylǵynyń irgetasyn qalaý kezinde qatelikter jibergen.