«QazAgro» jýrnalısterge konkýrs jarııalaıdy

ASTANA. 9 tamyz. QazAqparat - «QazAgro» ulttyq basqarýshy holdıngi» AQ agroónerkásibi taqyrybyna arnalǵan úzdik aqparattyq jáne analıtıkalyq materıaldarǵa  «AGRO PR-2012» konkýrsyn jarııalaıdy.

Bul týraly «QazAgro» AQ-nyń baspasóz qyzmeti habarlady.

Ótken jyly jarııalanǵan konkýrsta «Egemen Qazaqstan» respýblıkalyq gazetiniń belgili ekonomıkalyq sholýshysy Suńǵat Álipbaı jeńimpaz alanǵan bolatyn. Sondaı-aq basqa da júldeli oryndar «Ekspert Kazahstan» jýrnaly, «Habar», «STV» telearnalary, «Kostanaıskıe novostı», «Aıqyn», «Korporatsııa», «Agrojarshy» gazetteri, «Alaý» TRK sııaqty ortalyq jáne aımaqtyq BAQ ókilderine berildi.  Konkýrstyq komıssııaǵa eldiń barlyq óńirlerinen barlyǵy 61 ótinim kelip túsken bolatyn.

Byltyrǵy sııaqty bıylǵy konkýrstyń basty taqyryby - Memleket basshysynyń Qazaqstan halqyna jyl saıynǵy Joldaýyndaǵy aıtylǵan tapsyrmasynyń oryndalýy jáne agroónerkásiptik keshende memlekettik baǵdarlamany júzege asyrý boıynsha memlekettiń júrgizgen jumystarynyń nátıjelerin jarııalaý. Konkýrstyń túpkilikti maqsaty - memlekettiń AÓK salasynda júrgizgen jumysy týraly jurtshylyqtyń aqparattanýyn joǵarylatý.

 «AGRO PR-2012»  konkýrsyna qatysý úshin respýblıkalyq jáne aımaqtyq buqaralyq aqparat quraldarynyń, telestýdııalardyń, aqparattyq agenttikterdiń, veb-portaldardyń ókilderi shaqyrylady.  Konkýrsqa 2012 jyldyń 1 qańtarynan bastap 23 qarashaǵa deıin shyqqan baspasóz jáne elektrondyq materıaldar qabyldanady, olar Holdıngke 2012 jyldyń 30 qarashasyna deıin jiberilýi tıis.  Ótinimderdi quramyna Holdıng pen onyń enshiles aktsıonerlik qoǵamdarynyń ókilderi kiretin konkýrs komıssııasy qarastyratyn bolady, delingen holdıng taratqan aqparatta.

Tolyq aqparatty holdıngtiń saıtynan www.kazagro.kz nemese myna adreske [e-mail] .   hat ajzý arqyly alýǵa bolady.