«QazAgro» shtaty qansha protsent qysqaratyny belgili boldy

NUR-SULTAN. QazAqparat - QR Aýyl sharýashylyǵy vıtse-mınıstri Rústem Qurmanov «QazAgro» holdıngi qyzmetkerleriniń qysqartylatynyn aıtty, dep habarlaıdy QazAqparat tilshisi.

«Holdıngte 2017-2019 jyldary 417 adam qysqartyldy. Buryndary 2 479 adam bolsa, qazir 2066 adam jumys isteýde. Enshiles úsh uıymnyń taratylýy turǵysynda qysqartý bolady», - dedi R.Qurmanov Esep komıtetinde ótken otyrysta.

Onyń sózine qaraǵanda, shtatty tórtten bir bólikke qysqartý eskerilgen.

«Qysqartý 25 paıyzǵa jýyǵyn qamtıdy, ıaǵnı enshiles úsh uıymnyń esebinen. Kompanııalar toby boıynsha 2066 adam bar jáne ol taǵyda qysqarady», - dep túsindirdi vıtse-mınıstr.

Aıta keteıik, Esep komıtetinde «QazAgro» holdıngi men onyń enshiles uıymdary qyzmetiniń tıimdiligine júrgizilgen memlekettik aýdıt qorytyndysy jarııalandy.

Budan buryn habarlanǵandaı, bıyl mamyr aıynyń sońynda Parlament Senaty Qarjy jáne bıýdjet komıtetiniń keńeıtilgen otyrysynda «QazAgro» holdıngin saýyqtyrý boıynsha qadamdardyń iske asyrylý máselesin kóterdi.

Osy oraıda ekinshi deńgeıli bankter aýyl sharýashylyǵy taýarlaryn óndirýshilerge nesıe bermeıtindigi, al «QazAgro» eki jyl boıy shyǵynmen jumys istep jatqandyǵy aıtyldy.

Belgili bolǵandaı, «QazAgro» holdıngi» AQ-ny damytýdyń strategııalyq baǵdarlamasy ázirlenip jatyr.