«QazAgro» aýyl sharýashylyǵy jobalaryna ıgerilgen 120 mlrd. teńge týraly esep berdi

ASTANA. QazAqparat - Búgin OKQ brıfınginde «QazAgro» Ulttyq basqarýshy holdıngi» AQ basqarma basshysynyń mindetin atqarýshy Dáýren Maqajanov 120 mlrd. teńge aýyl sharýashylyǵyndaǵy qandaı ınvestıtsııalyq baǵdarlamalarǵa jumsalǵandyǵy týraly aıtyp berdi.

Osy oraıda ol bul qarjy 2009 jyly Ulttyq qordan 15 jylǵa 14 baǵyt boıynsha jobalardy júzege asyrý úshin bólingendigin eske salyp ótti.

«Búginde bul qarjy tolyǵymen ıgerilip, jańa óndiristerdi qurýǵa, kásiporyndardy jańǵyrtýǵa, eńbek ónimdiligin arttyrýǵa baǵyttaldy», - dedi D. Maqajanov.

Atap aıtqanda, osy baǵytta bólingen qarjyǵa mıkroklımatty jasaıtyn kompıýterlik júıemen 96 gektarlyq qazirgi zamanǵy jylyjaı keshenderi iske qosylady. Bul jylyjaı keshenderinde óndiristiń jalpy kólemi 51 400 tonna qyzanaq pen qııardy quraıdy.

«Sonymen qatar 4 800 gektar aýmaqqa tamshymen sýarý tehnologııalary engizildi. Bul turǵyda ónim shyǵymdylyǵy artady jáne sý únemdeledi», - dedi ol.

Budan bólek, 109 myń tonna sút ónimderi óndirisine arnalǵan iri sút fermalary jelisi ashyldy. 80 myń tonna et óndirýge múmkindik beretin qus fabrıkalarynyń jelesi salyndy.

Munymen qosa, astyq qoımalarynyń qurylysyna nazar aýdarylyp, bıdaı saqtaıtyn qoımalardyń kólemi 762 myń tonnaǵa artty. Al salynǵan kókónis saqtaıtyn qoımalarynyń kólemi 123 800 tonnany qurady.