«QazAgro» aýyl sharýashylyǵy tehnıkalaryn alý úshin EADB-nen 1,5 mlrd rýbl qaryz aldy

ASTANA. QazAqparat - «QazAgroQarjy» AQ qazaqstandyq sharýalardy aýyl sharýashylyǵy tehnıkasymen qamtamasyz etý maqsatynda Eýrazııalyq damý bankinen 1,5 mlrd. reseı rýblin tartty. Bul týraly «QazAgro» ulttyq holdınginiń baspasóz qyzmetinen habarlandy.

Ótken aıda «QazAgroQarjy» AQ Basqarma Tóraǵasynyń birinshi orynbasary Aınur Seıitqasymova men Eýrazııalyq damý bankisiniń aktıvter men passıvter jónindegi Basqarýshy dırektory Dmıtrıı Ladıkov-Roev kelisimshartqa qol qoıǵan bolatyn. Soǵan sáıkes, Eýrazııalyq Damý banki «QazAgroQarjy» aktsıonerlik qoǵamyna 1,5 mlrd. rýbl somasyna kredıt jelisin ashty.

Qarajat birinshi kezekte EADB qatysýshy memleketterinen Qazaqstannyń aýyl sharýashylyǵy tehnıkalaryn jáne jabdyqtar jetkizýdi qarjylandyrýǵa arnalǵan. Shart talaptaryna sáıkes, EADB qatysýshy memleketterinen tehnıka men jabdyq satyp alýǵa keminde 80% kredıt jelisi bólinetin bolady. Onyń negizgi bóligi Reseı Federatsııasynan tehnıka men jabdyq jetkizýge jumsalady dep josparlanyp otyr. Shart talaptaryna sáıkes, nesıelendirý EADB tikeleı qarjylandyrýy nysanynda teńgemen jáne rýblmen júzege asyrylatyn bolady.

Joba EADB mıssııasy men strategııasyna sáıkes keledi. Ol Qazaqstan Respýblıkasynyń aýyl sharýashylyǵy tehnıkasynyń parkin jetildirýge jáne onyń agroónerkásiptik keshenin damytýǵa yqpalyn tıgize otyryp, elimizdiń turaqty ekonomıkalyq turǵyda ósýine áserin tıgizedi. EADB qatysýshy memleketteriniń arasyndaǵy saýda kóleminiń ulǵaıýyna ákeledi.