«QazAgro» agroónerkásip kesheni salasynda 320,4 mlrd. teńgeniń 528 jobasyn qarjylandyrady

ASTANA. QazAqparat - «QazAgro» ulttyq holdınginiń ınvestıtsııalyq qorjynynda agroónerkásip kesheni salasynda jalpy quny 320,4 mlrd. teńgeniń 528 ınvestıtsııalyq jobasy qamtylyp otyr. Bul týraly ulttyq holdıngtiń baspasóz qyzmetinen habarlandy.

«Jobalardy paıdalanýǵa berý kezeńinde 16 myńǵa tarta jumys orny qurylady dep josparlanǵan. Al búgingi kezeńge deıin jalpy quny 262,3 mlrd. teńgeniń 453 ınvestıtsııalyq jobasy qarjylandyryldy jáne paıdalanýǵa berildi. Osynyń nátıjesinde 14 myń jumys orny quryldy», - delingen baspasóz baıanynda.
«QazAgro» Ulttyq holdınginiń Pavlodar oblysynyń agrarlyq sala keshenin qarjylandyrýy týraly aqparattarǵa súıensek, 2015 jyldyń qorytyndysy boıynsha óńirdegi aýyl sharýashylyǵy taýaryn óndirýshilerdi qoldaýǵa 11,7 mlrd.teńge baǵyttalǵan. Bul respýblıka boıynsha holdıng tarapynan bólingen jalpy somanyń 3,7 paıyzyn quraıdy.
«QazAgronyń» ınvestıtsııalyq qorjynynda Pavlodar oblysy boıynsha jalpy quny 18,9 mlrd.teńgeniń 46 jobasy bar. Onyń ishinde 17 mlrd. teńgeniń 38 jobasy paıdalanýǵa berilip, 1,5 myń jumys ornyn quryldy. 2015 jyly jıyntyq quny 7,8 mlrd. teńgeniń 10 jobasy iske qosyldy jáne 567 jumys orny ashyldy», - delingen baspasóz baıanynda.
Aıta keterligi, ótken jyldyń kóktemgi-egis jumystaryn júrgizýdi qoldaý sheńberinde Pavlodar oblysy boıynsha 1,5 mlrd.teńge somasyna 200 ótinim qoldaý tapqan. Sonymen qatar, 4,3 mlrd. teńgege 390 birlik aýylsharýashylyq tehnıkasyn satyp alý týraly shart jasalǵan. Sondaı-aq, 2015 jyly «QazAgro» holdınginiń enshiles kompanııalarymen Pavlodar oblysynda 1 mlrd. teńgeden asatyn somaǵa 12 nesıe seriktestikteri qarjylandyryldy. Jalpy, respýblıka boıynsha osy kezeń ishinde 20,1 mlrd.teńgege 137 nesıe seriktestigine qoldaý jasalǵan.