Kazache turǵyndary aýyl ataýynyń ózgermeı kele jatqanyna shaǵymdandy

<p>ÓSKEMEN. KAZINFORM — Kazache — Shyǵys Qazaqstan oblysy Ulan aýdanyndaǵy shaǵyn aýyl. Jergilikti halyq byltyrdan beri eldi meken ataýyn Birlik dep aýystyrýdy usynyp kele jatyr. Alaıda ázirge odan esh nátıje bolmaı tur. <a href="https://kaz.inform.kz/" target="_blank" rel="noopener">Kazinform</a> tilshisi aýyl ataýynyń ne sebepti ózgermeı kele jatqanyn bilip kórdi.</p>

Kazache aýyly halqynyń birligi jarasqan. Sodan da bolar dúıim jurt biraýyzdan aýyl ataýyn Birlik dep aýystyrýdy uıǵarǵan. Olardyń aıtýlarynsha, byltyr aýylda osyǵan baılanysty ótken jınalysqa aýdan ákimdiginen 3 qyzmetker kelgen.

— Sol jerde halyqtyń qoldaýymen aýyl atyn aýystyrý jaıly sheshim qabyldandy. Alaıda áli kúnge deıin aýyl ataýy ózgermeı, eldi mekenniń kireberisindegi taqtaıshada «Kazache» dep jazylyp tur, — deıdi Faızolda esimdi aýyl turǵyny.

Budan bólek, 10 jyl buryn aýyldaǵy Zareche kóshesine Qazaqstannyń halyq jazýshysy Ázilhan Nurshaıyqovtyń esimi berilipti. Biraq kóshe ataýy tek qujat júzinde ózgergen. Sebebi kúni búginge deıin úılerdiń mekenjaılary jazylatyn taqtaıshalarǵa jańa kóshe ataýy jazylmaǵan.

— Keı úılerde áli de «Zareche kóshesi» dep jazylyp tur. Bul nemquraılyq qoı! Nege taqtaıshalarǵa Ázilhan Nurshaıyqovtyń esimi jazylmaı keledi? — dep turǵyndar narazylyǵyn bildirdi.

Foto aýyl turǵyndarynan

Halyqty tolǵandarǵan bul saýaldardyń jaýabyn bilý úshin Ulan aýdany ákimdigine saýalhat joldap kórdik.

Jergilikti organ málimetinshe, 2023 jyldyń 11 jeltoqsanynda Ulan aýdanynyń Kazache aýylynyń ataýyn Birlik dep ózgertý boıynsha aýyl turǵyndarymen jınalys ótkizilgen.

Sondaı-aq sol jyly Ulan aýdanyndaǵy Gagarıno aýylyn — Jartas, 2024 jyly Novo-Azovoe aýylyn — Dolaǵaıly dep ózgertý týraly usynys túsken. 

Búgingi tańda atalǵan aýyldardyń ataýyn ózgertý boıynsha másele aýdanda qaralyp, aýyl turǵyndary tarapynan kópshilik daýyspen qoldaý taýyp, oblystyq onomastıka komıssııasynyń qaraýyna joldanǵan.

— Degenmen, QR Prezıdenti ákimshiliginiń tapsyrmasy boıynsha onomastıkalyq jumystar ýaqytsha toqtatylǵan. Osyǵan baılanysty aýyldyń ataýyn ózgertý týraly usynysty oblystyq onomastıka komıssııasynyń qaraý múmkindigi joq. Onomastıkalyq jumystardy júrgizýge ruqsat berilgen jaǵdaıda usynys qaralyp, sheshim shyǵarylady, — dep túsindirdi Ulan aýdany mádenıet, tilderdi damytý, dene shynyqtyrý jáne sport bóliminiń basshysy E.Satyev.

Onyń aıtýynsha, oń sheshim shyǵarylǵan jaǵdaıda ádilet organyna tirkeý jumystary júrgizilgen soń aýyl ataýy jazylǵan taqtaısha aýystyrylady.

— Al Kazache aýylynyń Zarechnaıa kóshesine Ázilhan Nurshaıyqovtyń esimi berilgeni ras. Qazirgi tańda aýyldyq okrýg ákimdigi tarapynan aýdandyq máslıhatqa úılerge taqtaısha jasatý úshin qarajat bólý jóninde tapsyrys berildi. Aqsha bólingen jaǵdaıda Ázilhan Nurshaıyqovtyń esimi jazylǵan taqtaıshalarǵa aýystyrylady, — deıdi bólim basshysy.