Qaza tapqan shahterlerdiń otbasyna qandaı kómek kórsetiledi

ASTANA. QazAqparat – Eńbek jáne halyqty áleýmettik qorǵaý mınıstrligi Eńbek jáne áleýmettik qorǵaý komıtetiniń tóraǵasy Tólegen Ospanqulov «Qazaqstan» shahtasyndaǵy apat kezinde qaza tapqan shahterlerdiń otbasyna qandaı kómek kórsetiletinin aıtty, dep habarlaıdy QazAqparat tilshisi.

«Bul mekemede jumysshy men jumys berýshiniń arasyndaǵy 2022-2024 jyldarǵa arnalǵan ujymdyq eńbek sharty bar. Sol ujymdyq eńbek sharty aıasynda qaıtys bolǵan adamdarǵa 10 jyldyq jalaqysy tólenedi. Qaıǵyly jaǵdaıda qaıtys bolǵan adamdardyń otbasyna páter alyp beriledi, balalarynyń oqýǵa túsýine jaǵdaı jasalady», - dedi ol Qaraǵandy óńirlik kommýnıkatsııalar qyzmeti alańyndaǵy brıfıngte.

Onyń atap ótýinshe, qazirgi ýaqytta aýrýhanada jatqan shahterlerge de kómek kórsetiledi.

«Olarǵa syrqattanýyna baılanysty járdemaqy, emdelýine baılanysty shyǵyndary 100 paıyz tólenedi. Eger emdelmeı múgedek bolyp qalsa, onda áleýmettik kómek kórsetiledi», - dedi Tólegen Ospanqulov.

Eske salaıyq, «Qazaqstan» shahtasynda órt keshe, 17 tamyz kúni saǵat 10:05-te tutandy.

Apat kezinde jer astynda 227 kenshi boldy. 222 adamdy jer betine jedel kóterý múmkin boldy, segizi zardap shekti.

5 jumysshynyń taǵdyry belgisiz boldy. Keıin olardyń biriniń denesi tabyldy. Qalǵan 3 adamdy izdestirý jalǵasyp jatyr.

Qaraǵandydaǵy kómir shahtasynda zardap shekkenderdiń arasynda eki adam jansaqtaý bólimine jetkizilgeni týraly habarlaǵan edik.

Aıta keteıik, Prezıdent «Qazaqstan» shahtasynda bolǵan órt sebebin anyqtaý úshin jan-jaqty tergeý júrgizýdi tapsyrdy.