Qaza tapqan ormanshynyń áıeli Prezıdentke júgindi

SEMEI. QazAqparat - Prezıdentpen kezdesýde alapat órt saldarynan qaza tapqan Alekseı Gýbaevtyń jubaıy Tatıana Býdıýk Memleket basshysyna suraq qoıdy, dep habarlaıdy QazAqparat Aqordaǵa silteme jasap.

Ol kúıeýiniń qyzmet barysynda nelikten ormanda jeke kóligimen júrgenin surady.

«Orman sharýashylyǵy fılıalynda jaǵdaı únemi osylaı. Kólikteriniń ne qosalqy bólshekteri joq, ne deni durys tehnıka joq. Únemi buzyla beredi. Joldasym jumystan shyǵý úshin aryz jazdy, basshylyq qol qoımaı qoıdy. Nege olaı istedi? Meniń oıymsha, bul jaǵdaıǵa orman sharýashylyǵy kináli. Endi ári qaraı qalaı ómir súremin? Balama ne aıtamyn? Jumys isteı almaımyn, kredıtterim bar», - dedi Tatıana Býdıýk.

Memleket basshysy qolynan kelgendi jasaýǵa ýáde berdi.

«Suraǵyńyz oryndy. Bul qaıǵyly jaǵdaıǵa kinálilerdiń bári jaýapqa tartylady. Otaǵasy endi qaıtyp kelmeıdi. Al otbasy jaǵdaıyńyzǵa kelsek, materıaldyq qarjylyq kómek kórsetiledi. Sizder muqtajdyq kórmes úshin qolymnan kelgendi jasaımyn, osy otbasylar meniń jeke baqylaýymda bolady», - dedi Qasym-Jomart Toqaev.