Qaza tapqan áskerıler týraly buryn túsirilgen beınerolık tabyldy
Beınerolıkti óziniń paraqshasynda QR Qorǵanys mınıstrliginiń burynǵy baspasóz xatshysy Janar Qolbachaeva jarııalady.
Atalmysh rolık osydan eki jyl buryn 2015 jyly Naýryz meıramy qarsańynda túsirilgen. Rolıkte áskerı jigitter at qulaǵynda oınap, bilektiń kúshin kórsetip qana qoımaı, ónerlerin de pash etedi.
«Qorǵanys mınıstrligindegi qyzmetimnen ketkenime kóp bolsa da, qaıǵydan shet qalyp, qaza tapqan jigitterdiń týystary men jaqyndary kóńil aıtpaı tura almaımyn. Bekem bolyńyzdar. Mundaı qaıǵy jeńil bolmaıtyny anyq. Meniń áriptesterime jýrnalısterdiń suraǵyna jaýap berý qandaı qıyn ekenin túsinemin. Solardyń qatysýymen Naýryz meıramyna arnap túsirilgen rolıkti taǵy bir kórsetkim keledi. Ómir solaı, olar aramyzda joq, biraq bizdiń júregimizde máńgi qala bermek. Imandy bolsyn!», - dep jazdy J. Qolbachaeva.
Aıta keteıik, buǵan deıin Jambyl oblysy Kóksaı shatqalynda oryn alǵan qar kóshkinine qatysty QR Qorǵanys mınıstrligi resmı málimdeme jasaǵan edi. Onda: «Jambyl oblysyndaǵy Kóksaı shatqalynda ótip jatqan 91678 áskerı bólimi áskerı qyzmetshileriniń jaýyngerlik daıyndyǵy boıynsha josparly sabaǵy barysynda kútpegen jerden qar kóshkini oryn aldy», - delingen. Sál keıinirek, QR ІІM Tótenshe jaǵdaılar komıtetiniń resmı ókili Rýslan Imanqulov qar kóshkini astynan 16 adam qutqarylyp , 7 adamnyń múrdesi tabylǵanyn málimdegen bolatyn.